سیکیورٹی فورسز کی بڑی کارروائیاں، خیبرپختونخوا اور بلوچستان میں 32 دہشتگرد ہلاک

سیکیورٹی فورسز کی بڑی کارروائیاں، خیبرپختونخوا اور بلوچستان میں 32 دہشتگرد ہلاک،سیکیورٹی فورسز ملک میں دہشتگردی کے مکمل خاتمے کے لیے پرعزم ہیں

راولپنڈی: سیکیورٹی فورسز نے خیبرپختونخوا اور بلوچستان کے مختلف علاقوں میں انٹیلی جنس بنیادوں پر کارروائیاں کرتے ہوئے مجموعی طور پر 32 دہشتگردوں کو ہلاک کرنے کا دعویٰ کیا ہے۔

پاک فوج کے شعبۂ تعلقات عامہ (آئی ایس پی آر) کے مطابق گزشتہ 24 گھنٹوں کے دوران خیبرپختونخوا اور بلوچستان میں مشترکہ آپریشنز کیے گئے، جن میں سیکیورٹی فورسز نے بھارتی سرپرستی میں سرگرم دہشتگرد نیٹ ورکس کو نشانہ بنایا۔

آئی ایس پی آر کے مطابق خیبر کے مختلف علاقوں میں کیے گئے متعدد آپریشنز کے دوران فتنہ الخوارج سے تعلق رکھنے والے 24 دہشتگرد ہلاک کیے گئے، جبکہ بلوچستان کے ضلع نوشکی میں کارروائی کے دوران فتنہ الہندوستان سے منسلک 8 دہشتگرد مارے گئے۔

ترجمان پاک فوج کے مطابق سیکیورٹی فورسز کی بڑی کارروائیوں کے دوران دہشتگردوں کے ٹھکانوں کو مؤثر انداز میں نشانہ بنایا گیا، جہاں سے بڑی مقدار میں اسلحہ، گولہ بارود اور دیسی ساختہ دھماکا خیز مواد (IEDs) بھی برآمد کیا گیا، جسے بعد ازاں ناکارہ بنا کر تباہ کر دیا گیا۔

آئی ایس پی آر نے بتایا کہ متعلقہ علاقوں میں کلیئرنس آپریشن جاری ہے تاکہ بھارتی سرپرستی میں سرگرم باقی دہشتگرد عناصر کا بھی سراغ لگا کر انہیں قانون کے کٹہرے میں لایا جا سکے۔

بیان میں کہا گیا کہ سیکیورٹی فورسز ملک میں دہشتگردی کے مکمل خاتمے کے لیے پرعزم ہیں اور عوام کے تعاون سے دہشتگردوں کے خلاف کارروائیاں پوری قوت کے ساتھ جاری رہیں گی۔

واضح رہے کہ خبر میں ہلاکتوں اورسیکیورٹی فورسز کی بڑی کارروائیوں سے متعلق تمام معلومات آئی ایس پی آر کے جاری کردہ بیان پر مبنی ہیں۔

In continuation of security forces operations against the terrorists nexus of Indian sponsored Fitna al Khwarij and Fitna al Hindustan, comprehensive joint operations are being carried in different parts of Khyber Pukhtunkhwa & Balochistan to weed out terrorists and their…
— DG ISPR (@OfficialDGISPR) July 29, 2026