اگلے ماہ آئی فون سمیت ایپل کی متعدد مصنوعات مہنگی ہونے کا امکان

اگلے ماہ آئی فون سمیت ایپل کی متعدد مصنوعات مہنگی ہونے کا امکان، اس وقت آئی فون، ایپل واچ اور ایئرپوڈز کو اس اضافے سے مستثنیٰ رکھا گیا

کیلیفورنیا: ٹیکنالوجی کمپنی ایپل کی جانب سے گزشتہ دنوں متعدد مصنوعات کی قیمتوں میں اضافے کے بعد اب اطلاعات سامنے آئی ہیں کہ آئندہ ماہ آئی فون، ایپل واچ اور ممکنہ طور پر ایئرپوڈز کی قیمتوں میں بھی اضافہ کیا جا سکتا ہے۔

رپورٹس کے مطابق ایپل نے حال ہی میں میک، آئی پیڈ، ایپل ٹی وی، ہوم پوڈ اور ویژن پرو سمیت کئی مصنوعات کی قیمتیں بڑھائی تھیں، جبکہ اس وقت آئی فون، ایپل واچ اور ایئرپوڈز کو اس اضافے سے مستثنیٰ رکھا گیا تھا۔

تاہم تجزیہ کاروں کا کہنا ہے کہ ستمبر میں متوقع آئی فون 18 سیریز کی رونمائی کے موقع پر ایپل کی متعدد مصنوعات کی قیمتوں میں بھی اضافہ متوقع ہے۔

اطلاعات کے مطابق آئی فون 18 پرو کی ابتدائی قیمت 1,299 سے 1,399 امریکی ڈالر کے درمیان ہو سکتی ہے، جبکہ موجودہ آئی فون 17 پرو کی ابتدائی قیمت 1,099 ڈالر ہے۔

روایتی طور پر ایپل نئی آئی فون سیریز متعارف کرانے کے بعد پرانے ماڈلز کی قیمت کم کر دیتا ہے، تاہم اس بار امکان ظاہر کیا جا رہا ہے کہ پرانے آئی فون ماڈلز کی قیمتیں برقرار رکھی جائیں گی یا ان میں بھی معمولی اضافہ کیا جا سکتا ہے۔

رپورٹس میں یہ بھی کہا گیا ہے کہ ایپل واچ سیریز 12 اور ایپل واچ الٹرا 4 کی قیمتیں بھی بڑھ سکتی ہیں، کیونکہ مصنوعی ذہانت (AI) سے متعلق بڑھتی ہوئی طلب کے باعث میموری اور دیگر الیکٹرانک پرزوں کی لاگت میں اضافہ ہو رہا ہے۔

دوسری جانب ماہرین کے مطابق ایئرپوڈز کی قیمتوں میں اضافے کا امکان نسبتاً کم ہے، کیونکہ ان کی تیاری پر میموری چپس کی بڑھتی ہوئی قیمتوں کا اثر ایپل کی متعدد مصنوعات کے مقابلے میں کم پڑتا ہے۔

تجزیہ کاروں کا کہنا ہے کہ اگر ایپل اپنی پوری پراڈکٹ لائن کی قیمتوں میں ردوبدل کرنا چاہتا ہے تو اس کا باضابطہ اعلان ستمبر میں ہونے والی سالانہ لانچ تقریب میں متوقع ہے۔

واضح رہے کہ ایپل ہر سال ستمبر میں اپنے نئے آئی فون اور ایپل کی متعدد مصنوعات متعارف کراتا ہے، جہاں قیمتوں، فیچرز اور دستیابی سے متعلق تفصیلات بھی جاری کی جاتی ہیں۔