رسالپور ای پی زیڈ میں صنعتی یونٹ کے خلاف مبینہ درآمدی فراڈ کا انکشاف، 11 کروڑ 70 لاکھ روپے ٹیکس چوری کا تخمینہ

رسالپور ای پی زیڈ میں صنعتی یونٹ کے خلاف مبینہ درآمدی فراڈ کا انکشاف، 11 کروڑ 70 لاکھ روپے ٹیکس چوری کا تخمینہ

رسالپور: پاکستان کسٹمز نے ای پی زیڈ (ایکسپورٹ پروسیسنگ زون) رسالپور میں قائم صنعتی یونٹ میسرز شپّو پرائیویٹ لمیٹڈ کے خلاف مبینہ درآمدی فراڈ، غیر قانونی درآمدات اور سرکاری محصولات کی چوری کے الزام میں ایف آئی آر درج کر لی۔

پاکستان کسٹمز کے مطابق صنعتی یونٹ کے خصوصی آڈٹ اور اسٹاک کی جانچ پڑتال کے دوران سامان کی بھاری مقدار میں کمی سامنے آئی، جس کے باعث کسٹمز ڈیوٹی اور ٹیکسوں کی ممکنہ چوری کا تخمینہ 11 کروڑ 70 لاکھ روپے لگایا گیا ہے۔

کسٹمز حکام کا کہنا ہے کہ کراچی پورٹ پر درآمدی کھیپ کی جانچ پڑتال کے دوران ایسی اشیاء کی درآمد کا بھی انکشاف ہوا جو متعلقہ صنعتی یونٹ کے لائسنس میں درج اجازت شدہ اشیاء سے مطابقت نہیں رکھتی تھیں۔ پاکستان کسٹمز کے مطابق خصوصی آڈٹ اور اسٹاک کی جانچ پڑتال میں سامان کی بڑی مقدار میں کمی سامنے آنے کے بعد 6 نومبر کو مبینہ فراڈ، دھوکہ دہی اور سرکاری محصولات کی چوری کے معاملے پر علیحدہ ایف آئی آر بھی درج کی گئی۔

حکام کے مطابق معاملے میں غیر مجاز اشیاء کی درآمد اور درآمدی قواعد کی مبینہ خلاف ورزیوں کا جائزہ لیا جا رہا ہے، جبکہ قانونی کارروائی جاری ہے۔ پاکستان کسٹمز کے مطابق 8 نومبر کو مذکورہ صنعتی یونٹ کے احاطے میں آتشزدگی کا واقعہ بھی پیش آیا، تاہم آگ لگنے کی وجوہات تاحال معلوم نہیں ہو سکیں۔

کسٹمز حکام کا کہنا ہے کہ متعلقہ زون اتھارٹی مروجہ طریقہ کار کے مطابق آتشزدگی کے واقعے کی وجوہات کا جائزہ لے گی۔ فی الحال آتشزدگی اور مبینہ درآمدی فراڈ کے درمیان کسی تعلق کی تصدیق سامنے نہیں آئی۔

پاکستان کسٹمز نے واضح کیا ہے کہ مبینہ فراڈ، دھوکہ دہی، غیر قانونی درآمدات اور سرکاری محصولات کی چوری کے خلاف قانونی کارروائی جاری رکھی جائے گی۔

واضح رہے کہ 11 کروڑ 70 لاکھ روپے کی رقم کسٹمز کی جانب سے ممکنہ ڈیوٹی اور ٹیکس چوری کا تخمینہ ہے، جبکہ صنعتی یونٹ کے خلاف الزامات کی حتمی حیثیت کا تعین قانونی کارروائی اور تحقیقات کے بعد ہوگا۔

پشاور کسٹم: 11 کروڑ 70 لاکھ روپے سے زائد ڈیوٹی و ٹیکس کی مبینہ چوری، کمپنی کے خلاف ایف آئی آر درج

پشاور: کلیکٹریٹ آف کسٹم (اپریزمنٹ) پشاور نے ایکسپورٹ پروسیسنگ زون رسالپور میں قائم کمپنی (Shippo Pakistan (Pvt.) Ltd.) کے خلاف ڈیوٹی فری درآمدی اشیاء کے مبینہ غیر قانونی اخراج، اسٹاک میں بڑے پیمانے پر فرق اور سرکاری محصولات کی مبینہ چوری کے الزامات پر کسٹمز ایکٹ 1969 کے سیکشن 161 کے تحت ایف آئی آر نمبر 23/2026 درج کر لی۔

ایف آئی آر کے مطابق جولائی 2021 سے نومبر 2026 تک درآمدی و برآمدی ریکارڈ اور فزیکل اسٹاک کی جانچ پڑتال کے دوران گلاس بورڈز، سوٹ کیسز، سفری بیگز، کپڑے اور دیگر اشیاء کے اسٹاک میں نمایاں فرق سامنے آیا۔ ابتدائی تخمینے کے مطابق قومی خزانے کو ڈیوٹی و ٹیکس کی مد میں تقریباً 117.09 ملین روپے کا نقصان پہنچنے کا خدشہ ظاہر کیا گیا ہے۔

مقدمے میں کمپنی کے ڈائریکٹرز، مالکان اور ملازمین سمیت ایکسپورٹ پروسیسنگ زون رسالپور کے زونل مینیجر اور چیف سکیورٹی آفیسر کو بھی شامل کیا گیا ہے۔ مزید تحقیقات جاری ہیں۔
— Ahmed Bhatti (@Rayahmadbhatti) November 9, 2026