لاہور دنیا کا آلودہ ترین بڑا شہر قرار، اے کیو آئی 600 سے تجاوز کر گیا
لاہور (9 نومبر 2026): لاہور میں فضائی آلودگی کی صورتحال تشویشناک ہوگئی، شہر عالمی سطح پر آلودہ ترین بڑے شہروں کی فہرست میں پہلے نمبر پر آگیا، جبکہ ایئر کوالٹی انڈیکس (AQI) مختلف اوقات میں 600 سے تجاوز کر گیا۔
عالمی ادارے آئی کیو ایئر (IQAir) کے مطابق پیر کی صبح 9 سے 10 بجے کے درمیان لاہور کا اے کیو آئی 590 ریکارڈ کیا گیا، جس کے باعث شہر دنیا کے آلودہ ترین بڑے شہروں میں سرفہرست رہا۔ پلیٹ فارم کے تاریخی اعدادوشمار میں اسی عرصے کے دوران ایک گھنٹے کی ریڈنگ 647 بھی دکھائی گئی، جو فضائی آلودگی کی خطرناک سطح کی نشاندہی کرتی ہے۔
آئی کیو ایئر کی عالمی فہرست میں منگولیا کا شہر اولان باتر 177 اے کیو آئی کے ساتھ دوسرے، بھارتی دارالحکومت نئی دہلی 174 کے ساتھ تیسرے، کولکتہ 173 کے ساتھ چوتھے اور بوسنیا کا شہر سرائیوو 170 کے ساتھ پانچویں نمبر پر رہا۔
لاہور کے مختلف علاقوں میں بھی فضائی آلودگی کی انتہائی بلند سطح ریکارڈ کی گئی۔ آئی کیو ایئر کے اسٹیشن اعدادوشمار کے مطابق علامہ اقبال ٹاؤن کا اے کیو آئی 1,033، سی ای آر پی آفس کا 864 اور برکی روڈ پیراگون کا 748 تک پہنچ گیا۔
صرف لاہور ہی نہیں بلکہ پنجاب کے دیگر شہر بھی شدید آلودگی کی لپیٹ میں ہیں۔ آئی کیو ایئر کی پاکستان کی ریئل ٹائم فہرست کے مطابق رائیونڈ میں اے کیو آئی 688، ملتان میں 655، لاہور میں 639 اور فیصل آباد میں 600 ریکارڈ کیا گیا۔ مختلف اوقات اور مانیٹرنگ اسٹیشنز کی ریڈنگ میں فرق ہوسکتا ہے۔ پنجاب حکومت نے ایک روز قبل خبردار کیا تھا کہ بھارتی پنجاب میں دیوالی کے آتش بازی، فصلوں کی باقیات جلانے اور مشرقی ہواؤں کے باعث لاہور اور ملحقہ اضلاع میں فضائی آلودگی بڑھ سکتی ہے۔
8 نومبر کو جاری خصوصی رپورٹ میں پیش گوئی کی گئی تھی کہ دیوالی کی آتش بازی کا دھواں پانچ سے 13 گھنٹوں کے اندر لاہور پہنچ سکتا ہے۔ رپورٹ کے مطابق مشرقی ہوائیں بھارتی علاقوں سے آلودہ ہوا پاکستان کی جانب لاسکتی ہیں، جس سے 9 نومبر کی صبح لاہور، قصور اور سرحدی علاقوں میں آلودگی بڑھنے کا امکان تھا۔
رپورٹ میں بھارتی شہر امرتسر کو سرحد پار سے آلودگی کے ممکنہ ذرائع میں شامل کیا گیا، جو لاہور سے تقریباً 50 کلومیٹر کے فاصلے پر واقع ہے۔ تاہم لاہور کی آلودگی میں سرحد پار دھوئیں کا حقیقی حصہ جاننے کے لیے پیمائش پر مبنی سائنسی جائزہ ضروری قرار دیا گیا ہے۔ پنجاب حکومت کی رپورٹ کے مطابق 4 نومبر تک بھارتی پنجاب میں فصلوں کی باقیات جلانے کے 2,347 واقعات رپورٹ ہوئے، جن میں سے 1,081 واقعات ترن تارن، فیروزپور اور امرتسر کے اضلاع میں سامنے آئے۔ یہ تعداد بھارتی پنجاب میں رپورٹ ہونے والے مجموعی واقعات کا تقریباً 46 فیصد بنتی ہے۔
دوسری جانب سیٹلائٹ ڈیٹا کے تجزیے سے پاکستان میں بھی زرعی زمینوں پر آگ لگنے کے متعدد مقامات کی نشاندہی ہوئی ہے۔ حماری ہوا کے مطابق یکم سے 29 اکتوبر 2026 کے دوران ناسا کے VIIRS سیٹلائٹ ڈیٹا میں پاکستانی پنجاب میں آگ کے 13,241 جبکہ بھارتی پنجاب میں 3,158 مقامات ریکارڈ کیے گئے۔ پاکستانی پنجاب میں سامنے آنے والی ان نشاندہیوں میں سے 92 فیصد زرعی زمینوں پر تھیں۔
15 اکتوبر سے یکم نومبر تک کے ایک الگ تجزیے میں لاہور کے گرد 100 کلومیٹر کے دائرے میں دونوں جانب فصلوں سے متعلق آگ کی 7,130 سیٹلائٹ نشاندہیاں سامنے آئیں، جن میں سے 781 مقامات لاہور کے مرکزی علاقے سے 40 کلومیٹر کے اندر تھے۔
واضح رہے کہ سیٹلائٹ پر آگ کی نشاندہی کو ہر مقام پر فصلوں کی باقیات جلانے کا تصدیق شدہ واقعہ نہیں سمجھا جاسکتا۔
محکمہ تحفظ ماحولیات پنجاب (EPA) کے مطابق صوبے میں زرعی زمینوں پر آگ لگنے کے 679 واقعات رپورٹ ہوئے، جن میں سے 650 کو مشترکہ نگرانی اور فائر فائٹنگ کارروائیوں کے ذریعے بجھا دیا گیا۔
محکمے نے فصلوں کی باقیات جلانے کے خلاف کارروائیوں کے لیے رات کے خصوصی اسکواڈز، ڈرونز، ٹریکٹر پر نصب فائر باؤزرز اور فوری ردعمل دینے والی ٹیمیں تعینات کر رکھی ہیں۔
ای پی اے کے مطابق پنجاب کلائمیٹ واچ ہب سیٹلائٹ کے ذریعے آگ کی غیر معمولی سرگرمیوں کی نشاندہی کرکے متعلقہ ضلعی ٹیموں کو آگاہ کرتا ہے تاکہ موقع پر تصدیق اور کارروائی کی جاسکے۔ ان کارروائیوں میں شیخوپورہ، ننکانہ صاحب، فیصل آباد، قصور، سیالکوٹ، سرگودھا اور گوجرانوالہ سمیت مختلف اضلاع شامل ہیں۔
محکمہ ماحولیات کے ڈائریکٹر جنرل عبداللہ نیئر شیخ نے متعلقہ افسران کو انسدادِ فصل باقیات جلانے کی کارروائیوں کو ترجیح دینے اور خود نگرانی کرنے کی ہدایت کی ہے۔ محکمے کے مطابق غیر قانونی طور پر فصلوں کی باقیات جلانے والوں کے خلاف قانونی کارروائی بھی کی جارہی ہے۔ حکومتی رپورٹ کے مطابق دیوالی سے پہلے ہی لاہور میں رات کے وقت پی ایم 2.5 کی سطح 202 مائیکروگرام فی مکعب میٹر تک پہنچ چکی تھی۔ رپورٹ میں خبردار کیا گیا کہ موسمی حالات کے باعث آتش بازی اور زرعی آگ سے پیدا ہونے والی آلودگی فضا میں جمع ہوسکتی ہے۔
حکومت نے پیش گوئی کی تھی کہ 9 اور 10 نومبر کو فضائی آلودگی کی سطح بلند رہ سکتی ہے، تاہم 11 نومبر سے معمولی بہتری آنے کا امکان ہے۔
محکمہ تحفظ ماحولیات 10 نومبر کو مختلف آلودگی کے ذرائع اور موسمی حالات کے اثرات سے متعلق تقابلی نتائج جاری کرنے والا ہے۔ اس جائزے سے یہ سمجھنے میں مدد مل سکتی ہے کہ لاہور کی فضائی آلودگی میں مقامی اخراج اور سرحد پار سے آنے والی آلودہ ہوا کا کتنا حصہ ہے۔
جبکہ پنجاب کے محکمہ تحفظ ماحولیات و موسمیاتی تبدیلی (EPCCD Punjab) کے مطابق دیوالی سے قبل لاہور کا ایئر کوالٹی انڈیکس (AQI) 272 ریکارڈ کیا گیا تھا، جو دیوالی کے دوران بڑھ کر 483 تک پہنچ گیا۔
محکمے نے اپنے آفیشل ایکس اکاؤنٹ پر جاری بیان میں کہا کہ یہ اعدادوشمار ظاہر کرتے ہیں کہ فضائی معیار کتنی تیزی سے تبدیل ہوسکتا ہے۔ بیان میں مزید کہا گیا کہ اسموگ سرحدوں کی پابند نہیں ہوتی، اس لیے فضائی آلودگی کو سمجھنے اور اس سے نمٹنے کے لیے بھی مشترکہ کوششوں کی ضرورت ہے۔
Lahore's reported AQI rose from 272 before Diwali to 483 during Diwali, highlighting how quickly air quality can change.
Smog knows no borders. Neither should our efforts to understand and address it.
One Airshed, Shared Responsibility.
#EPAPunjab #EPCCD #smogfreepunjab https://t.co/1B5VNs93bB
— @EPCCDPUNJAB (@EPCCDpunjab) November 9, 2026
READ MORE FAQS”
9 نومبر 2026 کو لاہور کا اے کیو آئی کتنا ریکارڈ کیا گیا؟
آئی کیو ایئر کی عالمی درجہ بندی میں صبح 9 سے 10 بجے لاہور کا اے کیو آئی 590 ریکارڈ ہوا، جبکہ تاریخی گراف میں ایک گھنٹے کی ریڈنگ 647 بھی دکھائی گئی۔
لاہور دنیا کے آلودہ ترین شہروں میں کس نمبر پر رہا؟
9 نومبر 2026 کو آئی کیو ایئر کی عالمی بڑے شہروں کی فہرست میں لاہور پہلے نمبر پر رہا۔
لاہور کے کن علاقوں میں اے کیو آئی سب سے زیادہ ریکارڈ ہوا؟
آئی کیو ایئر کے اسٹیشن ڈیٹا کے مطابق علامہ اقبال ٹاؤن میں 1,033، سی ای آر پی آفس میں 864 اور برکی روڈ پیراگون میں 748 اے کیو آئی ریکارڈ ہوا۔
لاہور میں اسموگ اور فضائی آلودگی بڑھنے کی کیا وجوہات ہیں؟
فضائی آلودگی میں گاڑیوں اور صنعتی اخراج، فصلوں کی باقیات جلانے، آتش بازی اور موسمی حالات سمیت مختلف عوامل کردار ادا کرسکتے ہیں۔ سرحد پار سے آنے والی آلودگی کا درست حصہ جاننے کے لیے مزید سائنسی جائزے کی ضرورت ہے۔
