اسلام آباد بلدیاتی انتخابات کا معاملہ عدالت پہنچ گیا

اسلام آباد میں بلدیاتی انتخابات کا معاملہ، ہائیکورٹ نے فیصلہ محفوظ کرلیا

اسلام آباد ہائیکورٹ نے وفاقی دارالحکومت میں بلدیاتی انتخابات کا شیڈول معطل کرنے سے متعلق درخواستوں پر فریقین کے دلائل سننے کے بعد فیصلہ محفوظ کرلیا۔

اسلام آباد میں بلدیاتی انتخابات کے انعقاد سے متعلق قانونی معاملہ ایک بار پھر عدالت پہنچ گیا۔ اسلام آباد ہائیکورٹ نے الیکشن کمیشن کے جاری کردہ انتخابی شیڈول اور حلقہ بندیوں کو چیلنج کرنے والی درخواستوں پر سماعت کے بعد فیصلہ محفوظ کرلیا ہے۔

جسٹس عمیر مجید ملک نے درخواست کی سماعت کی۔ دورانِ سماعت درخواست گزار کے وکیل نے مؤقف اختیار کیا کہ اگر انتخابی شیڈول معطل نہ کیا گیا تو امیدوار انتخابی مہم پر لاکھوں روپے خرچ کردیں گے۔

درخواست گزار کے وکیل کے مطابق 2024 میں نئی حلقہ بندیاں کی گئی تھیں، جس کے بعد انتخابات کا شیڈول جاری کیا گیا، تاہم 2026 میں نیا بلدیاتی آرڈیننس متعارف کرائے جانے سے قانونی صورتحال تبدیل ہوگئی۔ وکیل نے مؤقف اپنایا کہ آرڈیننس ختم ہونے کے بعد بھی سابقہ حلقہ بندیوں کی قانونی حیثیت واضح کیے بغیر انتخابی عمل آگے بڑھایا جا رہا ہے۔

عدالت نے استفسار کیا کہ نئی حلقہ بندیاں کس قانونی حکم کے تحت کی گئی تھیں۔ سماعت کے دوران ووٹر لسٹوں کی عدم فراہمی اور انتخابی وارڈز کی تشکیل سے متعلق نکات بھی زیر بحث آئے۔

جسٹس عمیر مجید ملک نے ریمارکس دیے کہ اگر کوئی امیدوار انتخابی مہم پر لاکھوں روپے خرچ کرتا ہے تو یہ عدالت کی ذمہ داری نہیں، تاہم انتخابی اخراجات اور ظاہر کیے جانے والے اخراجات کے درمیان فرق سے متعلق سوال بھی اٹھایا۔

درخواست گزار کے وکیل نے عدالت سے استدعا کی کہ قانونی معاملات طے ہونے تک انتخابی عمل اور شیڈول معطل کیا جائے۔ عدالت نے دلائل سننے کے بعد درخواستوں پر فیصلہ محفوظ کرلیا۔

واضح رہے کہ الیکشن کمیشن نے 21 اکتوبر 2026 کو اسلام آباد میں بلدیاتی انتخابات کے انعقاد کے لیے نیا انتخابی پروگرام جاری کرنے کی ہدایت کی تھی، جبکہ بعد ازاں انتخابی شیڈول میں نامزدگی کاغذات جمع کرانے کی تاریخ میں توسیع بھی کی گئی تھی۔