معدنی دولت کو کارآمد بنانا قومی مقصد ہے، خام برآمدات کے بجائے ویلیو ایڈیشن پر توجہ دینا ہوگی: فیلڈ مارشل

معدنی دولت کو کارآمد بنانا قومی مقصد ہے، خام برآمدات کے بجائے ویلیو ایڈیشن پر توجہ دینا ہوگی: فیلڈ مارشل عاصم منیر

اسلام آباد: چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی معدنی دولت کو کارآمد بنانا ہمارا اجتماعی قومی مقصد ہے، معدنی وسائل سے مقامی آبادیوں کو بھی براہِ راست فائدہ پہنچنا چاہیے۔

اسلام آباد میں جاری منرلز فورم سے خطاب کرتے ہوئے فیلڈ مارشل عاصم منیر نے کہا کہ معدنیات سے مالا مال علاقوں کے لوگوں کو اپنی زندگیوں میں ٹھوس بہتری نظر آنی چاہیے۔

انہوں نے کہا کہ پاکستان کا مقصد صرف خام معدنیات برآمد کرنا نہیں بلکہ ریفائننگ اور مینوفیکچرنگ سمیت پوری ویلیو چین کو فروغ دینا ہے۔

فیلڈ مارشل عاصم منیر کا کہنا تھا کہ پاکستان ایسی طویل مدتی شراکت داریوں کو فروغ دینا چاہتا ہے جو ملک اور اس کے شراکت داروں کے لیے پائیدار معاشی فوائد کا باعث بنیں۔

انہوں نے مزید کہا کہ پاکستانی عوام محنتی، دلیر اور پرعزم ہیں اور ان میں خوابوں کو حقیقت میں بدلنے کی بھرپور صلاحیت موجود ہے۔ ہمارے وسائل مواقع فراہم کرتے ہیں، جبکہ ان مواقع کو نتائج میں تبدیل کرنے کی اصل طاقت عوام ہیں۔

ان کا کہنا تھا کہ اب پاکستان کو صلاحیت سے پیداوار، وعدوں سے عملی اقدامات اور خام معدنیات کی برآمد سے ویلیو ایڈڈ ترقی کی جانب پیش رفت کرنا ہوگی۔