وزیراعظم کا شکر گزار ہوں، انہوں نے پیپلز پارٹی کا مینڈیٹ تسلیم کیا:بلاول بھٹو

گلگت بلتستان میں بلاول بھٹو کا خطاب، وزیراعظم شہباز شریف کا شکریہ، آئینی حقوق اور ترقی کا عزم

بلاول بھٹو گلگت بلتستان خطاب میں چیئرمین پاکستان پیپلز پارٹی بلاول بھٹو زرداری نے کہا ہے کہ وہ وزیراعظم شہباز شریف کے شکر گزار ہیں کہ انہوں نے گلگت بلتستان میں پاکستان پیپلز پارٹی کے عوامی مینڈیٹ کو تسلیم کیا۔

گلگت بلتستان کے نومنتخب وزیراعلیٰ امجد حسین ایڈووکیٹ کی حلف برداری کی تقریب سے خطاب کرتے ہوئے بلاول بھٹو زرداری نے کہا کہ مسلم لیگ (ن) کے منتخب نمائندوں نے بھی پیپلز پارٹی کی حمایت کی، جس پر وہ ان کے شکر گزار ہیں۔ انہوں نے کہا کہ تمام سیاسی قوتیں مل کر گلگت بلتستان کی ترقی، خوشحالی اور عوامی فلاح کے لیے کام کریں گی۔

بلاول بھٹو نے کہا کہ گلگت بلتستان کے عوام آج بھی ذوالفقار علی بھٹو کی خدمات کو یاد کرتے ہیں۔ انہوں نے کہا کہ اس خطے کے عوام نے ڈوگرہ راج سے آزادی کے لیے عظیم قربانیاں دیں، جنہیں پوری قوم قدر کی نگاہ سے دیکھتی ہے۔

انہوں نے عزم ظاہر کیا کہ گلگت بلتستان کے عوام کو ان کے آئینی حقوق دلانے کے لیے کوششیں جاری رکھی جائیں گی۔ ان کا کہنا تھا کہ وہ وہ دن دیکھنا چاہتے ہیں جب گلگت بلتستان کے منتخب نمائندے قومی اسمبلی میں بھی عوام کی نمائندگی کریں گے۔

بلاول بھٹو زرداری نے کہا کہ پیپلز پارٹی نے عوام سے حقِ ملکیت کا جو وعدہ کیا تھا، اس پر عملدرآمد کیا جائے گا۔ انہوں نے یقین دلایا کہ حکومت اور اپوزیشن کی تفریق کے بغیر گلگت بلتستان کے تمام عوام کو یکساں ترقیاتی مواقع فراہم کیے جائیں گے۔

انہوں نے کہا کہ گلگت بلتستان میں پبلک پرائیویٹ پارٹنرشپ کے ذریعے زراعت اور دیگر معاشی شعبوں میں سرمایہ کاری کے وسیع مواقع موجود ہیں۔ وفاق اور گلگت بلتستان کی حکومت مل کر ایسا معاشی ماحول پیدا کریں گی، جس سے مقامی نوجوانوں کو روزگار اور کاروبار کے نئے مواقع میسر آئیں۔

چیئرمین پیپلز پارٹی نے کہا کہ پاکستان میں سیاست کو اکثر اختلاف اور محاذ آرائی سے جوڑا جاتا ہے، لیکن گلگت بلتستان میں ایسی حکومت قائم کی جائے گی جو تمام شہریوں کی نمائندہ ہوگی۔ انہوں نے اعلان کیا کہ سردیوں سے قبل گلگت بلتستان میں بلدیاتی انتخابات کرائے جائیں گے تاکہ مقامی سطح پر عوامی نمائندگی کو مزید مضبوط بنایا جا سکے۔