سابق آرمی چیف کی عمران خان سے جیل میں ملاقات کی خبریں بے بنیاد ہیں،بعض نمائندے اور منتخب اراکین جلد اڈیالہ جیل کا دورہ کرنے کا ارادہ رکھتے، علیمہ خان
راولپنڈی: پاکستان تحریک انصاف (پی ٹی آئی) کے بانی چیئرمین عمران خان کی ہمشیرہ علیمہ خان نے سابق آرمی چیف کی عمران خان سے جیل میں مبینہ ملاقات کی خبروں کو بے بنیاد قرار دیتے ہوئے کہا ہے کہ ایسی اطلاعات جان بوجھ کر پھیلائی جا رہی ہیں تاکہ عوام کی توجہ اصل مسائل سے ہٹائی جا سکے۔
انسداد دہشت گردی عدالت راولپنڈی میں پیشی کے بعد میڈیا سے گفتگو کرتے ہوئے علیمہ خان نے کہا کہ گزشتہ چند روز سے یہ خبریں گردش کر رہی ہیں کہ سابق آرمی چیف نے اڈیالہ جیل میں بانی پی ٹی آئی سے ملاقات کی، تاہم اس دعوے میں کوئی صداقت نہیں۔
انہوں نے کہا کہ انہوں نے اس حوالے سے پی ٹی آئی رہنما بیرسٹر گوہر علی خان سے بھی رابطہ کیا، جنہوں نے واضح کیا کہ ایسی کوئی ملاقات نہیں ہوئی۔ علیمہ خان کے مطابق یہ خبریں مکمل طور پر جھوٹی ہیں اور انہیں پھیلانے کا مقصد سیاسی ماحول کو متاثر کرنا ہے۔
علیمہ خان نے 26 نومبر کے احتجاج سے متعلق مقدمے پر بھی گفتگو کرتے ہوئے کہا کہ ان پر الزام عائد کیا گیا ہے کہ انہوں نے احتجاج کا پیغام عوام تک پہنچایا، حالانکہ عمران خان نے خود جیل میں صحافیوں سے گفتگو کے دوران احتجاج کا اعلان کیا تھا۔
ان کا کہنا تھا کہ ان کے وکیل نے عدالت میں مؤثر دلائل دیے، تاہم اگر انہیں سزا دی جاتی ہے تو وہ اس کا سامنا کریں گی کیونکہ انہوں نے کوئی جرم نہیں کیا۔ انہوں نے مزید کہا کہ وہ مقدمے کا جلد فیصلہ چاہتی ہیں اور اسی لیے عدالت سے جلد سماعت کی درخواست بھی کی گئی ہے۔
علیمہ خان نے کہا کہ عمران خان کو مکمل قیدِ تنہائی میں رکھا گیا ہے اور ان کی ضمانت کے معاملات میں بھی رکاوٹیں ڈالی جا رہی ہیں۔ انہوں نے دعویٰ کیا کہ حکومتی حلقے خود بھی یہ طے نہیں کر پا رہے کہ عمران خان کے معاملے میں آگے کیا حکمت عملی اختیار کی جائے۔
انہوں نے مزید بتایا کہ خیبرپختونخوا حکومت کے بعض نمائندے اور منتخب اراکین جلد اڈیالہ جیل کا دورہ کرنے کا ارادہ رکھتے ہیں تاکہ پارٹی قیادت سے ملاقات اور موجودہ صورتحال پر تبادلہ خیال کیا جا سکے۔
سیاسی مبصرین کے مطابق عمران خان سے متعلق گردش کرنے والی خبروں اور سیاسی بیانات نے ایک بار پھر ملکی سیاسی ماحول کو گرما دیا ہے، جبکہ مختلف حلقوں کی جانب سے ان خبروں کی حقیقت جاننے کے لیے سوالات اٹھائے جا رہے ہیں۔
All the news circulating on social media that a former Army Chief met Imran Khan in Adiala Jail are fake.
We have checked with Barrister Gohar and he has also confirmed that this is totally fake!
It is disinformation especially spread to distract from the fact that Imran Khan…
— Aleema Khanum (@Aleema_KhanPK) June 1, 2026
