جاوید ہاشمی اور ان کے دو دامادوں کے خلاف مبینہ بجلی چوری کے مقدمات درج

جاوید ہاشمی اور ان کے دو دامادوں کے خلاف مبینہ بجلی چوری کے مقدمات درج

ملتان: ملتان میں سینئر سیاستدان جاوید ہاشمی اور ان کے دو دامادوں کے خلاف مبینہ بجلی چوری کے الزام میں الگ الگ مقدمات درج کر لیے گئے ہیں۔ پولیس کے مطابق مقدمات تھانہ مخدوم رشید میں درج کیے گئے، جبکہ معاملے کی مزید تحقیقات جاری ہیں۔

میپکو (MEPCO) کے ترجمان کے مطابق بجلی چوری کے خلاف جاری خصوصی مہم کے دوران مختلف مقامات پر کارروائیاں کی گئیں، جہاں مبینہ طور پر ڈائریکٹ کنڈیاں لگا کر بجلی استعمال کیے جانے کا انکشاف ہوا۔

ترجمان کا کہنا ہے کہ کارروائی کے دوران متعلقہ مقامات سے بجلی کے میٹر قبضے میں لے لیے گئے ہیں اور بجلی چوری کے الزامات پر قانونی کارروائی کا باقاعدہ آغاز کر دیا گیا ہے۔

پولیس کے مطابق جاوید ہاشمی اور ان کے دونوں دامادوں کے خلاف الگ الگ مقدمات درج کیے گئے ہیں، جن میں بجلی چوری کے الزامات کی تحقیقات کی جا رہی ہیں۔ حکام کا کہنا ہے کہ قانون کے مطابق تمام شواہد کا جائزہ لینے کے بعد مزید کارروائی عمل میں لائی جائے گی۔

ذرائع کے مطابق ہفتے کی شام جاوید ہاشمی کی رہائش گاہ کی بجلی بھی منقطع کر دی گئی تھی، جبکہ میپکو کی ٹیم نے موقع پر ضروری قانونی کارروائی مکمل کی۔

واضح رہے کہ ملک بھر میں بجلی چوری کے خلاف حکومت اور بجلی تقسیم کار کمپنیوں کی جانب سے کارروائیاں جاری ہیں، جن کے تحت مختلف شہروں میں غیر قانونی کنکشنز کے خلاف آپریشن کیے جا رہے ہیں۔ اس سلسلے میں حکام کا کہنا ہے کہ بجلی چوری میں ملوث افراد کے خلاف بلاامتیاز کارروائی جاری رہے گی۔

مجھ پر اور میرے دامادوں مخدوم زاہد بہار ہاشمی اور بیرسٹر مخدوم شاہزیب ہاشمی پر بجلی چوری کا مقدمہ درج۔ 

مجھے گرفتار کرلیں میں ضمانت بھی نہیں کراؤں گا۔ جو بھی الزام لگائیں میں ضمانت نہیں کراؤں گا۔ میں اپنے گھر میں بیٹھا ہوں آئیں اور گرفتار کریں۔ نا کہیں چھپوں گا نہیں کہیں جاؤں… pic.twitter.com/wj9CZYB1vw
— Javed Hashmi (@JavedHashmiJH) July 18, 2026