اسلام آباد میں تجاوزات کے خلاف بلاامتیاز کارروائیاں جاری رہیں گی، محسن نقوی

محسن نقوی نے اسلام آباد میں تجاوزات کے خاتمے کا اعلان کیا، کشمیر چوک انڈر پاس منصوبے پر 20 روز میں 78 فیصد کام مکمل

وفاقی وزیر داخلہ محسن نقوی نے کہا ہے کہ اسلام آباد میں تجاوزات کے خاتمے کے لیے بلاامتیاز کارروائیاں جاری رکھی جائیں گی۔ ان کا کہنا تھا کہ شہر میں غیر قانونی تجاوزات برداشت نہیں کی جائیں گی، جبکہ آج کھنہ تھانے کی عمارت بھی گرا دی گئی ہے۔

کشمیر چوک انڈر پاس منصوبے کے دورے کے بعد میڈیا سے گفتگو کرتے ہوئے محسن نقوی نے کہا کہ اسلام آباد میں تجاوزات کے خلاف کارروائیوں کا سلسلہ جاری ہے۔ انہوں نے واضح کیا کہ اس معاملے میں کسی قسم کی تفریق نہیں کی جائے گی۔

وفاقی وزیر داخلہ نے بتایا کہ کشمیر چوک انڈر پاس منصوبے کے اطراف 6 ہزار درخت لگائے جائیں گے تاکہ علاقے کو سرسبز و شاداب اور خوبصورت بنایا جا سکے۔

انہوں نے متعلقہ حکام کو منصوبے کے اطراف دیدہ زیب لائٹنگ نصب کرنے کی بھی ہدایت کی۔ ان کا کہنا تھا کہ منصوبے کی تکمیل کے ساتھ اس کے اطراف کی خوبصورتی اور ماحول کو بہتر بنانے پر بھی توجہ دی جائے گی۔

محسن نقوی نے بتایا کہ کشمیر چوک انڈر پاس منصوبے پر صرف 20 روز میں 78 فیصد کام مکمل کر لیا گیا ہے اور منصوبہ تکمیلی مراحل میں داخل ہو چکا ہے۔

انہوں نے باقی ماندہ تعمیراتی کام جلد مکمل کرنے اور منصوبے کو مقررہ مدت کے اندر پایۂ تکمیل تک پہنچانے کی ہدایت کی۔ اس موقع پر وفاقی وزیر داخلہ کو منصوبے پر جاری تعمیراتی سرگرمیوں، پیشرفت اور تکمیل کی ٹائم لائن کے حوالے سے تفصیلی بریفنگ بھی دی گئی۔

وفاقی وزیر داخلہ کے مطابق کشمیر چوک انڈر پاس کی تکمیل سے مری اور مظفرآباد جانے والے شہریوں کو بڑا ریلیف ملے گا، جبکہ راولپنڈی اور اسلام آباد کے درمیان آمدورفت بھی مزید آسان ہو جائے گی۔

انہوں نے کہا کہ ایکسپریس وے پر ٹریفک جام کے مسئلے کو حل کرنے کے لیے بھی اقدامات کیے جا رہے ہیں۔ منصوبے کی تکمیل سے شہریوں کو سفری سہولت فراہم کرنے اور ٹریفک کی روانی بہتر بنانے میں مدد ملنے کی توقع ہے۔

محسن نقوی نے متعلقہ حکام کو ہدایت کی کہ منصوبے کے باقی ماندہ کام تیزی سے مکمل کیے جائیں تاکہ اسے مقررہ وقت پر عوام کے لیے کھولا جا سکے۔