قومی و داخلی سلامتی اجلاس: خیبرپختونخوا میں انٹیلی جنس بیسڈ آپریشنز بڑھانے کا فیصلہ

قومی و داخلی سلامتی اجلاس: خیبرپختونخوا میں انٹیلی جنس بیسڈ آپریشنز بڑھانے کا فیصلہ

اسلام آباد: وزیراعظم شہباز شریف کی زیر صدارت قومی و داخلی سلامتی سے متعلق اہم اجلاس میں خیبرپختونخوا کی سیاسی و امن و امان کی صورتحال اور ملک بھر میں دہشت گردی کے خلاف جاری اقدامات کا تفصیلی جائزہ لیا گیا۔ اجلاس میں انسداد دہشت گردی کے لیے انٹیلی جنس بیسڈ آپریشنز (IBOs) کا دائرہ کار بڑھانے اور وفاقی و صوبائی اداروں کے درمیان رابطہ کاری مزید مؤثر بنانے کا فیصلہ کیا گیا۔

وزیراعظم ہاؤس میں ہونے والے سلامتی اجلاس میں چیئرمین پاکستان پیپلز پارٹی بلاول بھٹو زرداری کی قیادت میں پیپلزپارٹی کے وفد، اعلیٰ عسکری و سول حکام اور وفاقی وزراء نے شرکت کی۔ اجلاس میں خیبرپختونخوا اور پنجاب کے گورنرز، وزیراعلیٰ بلوچستان، وزیراعظم آزاد کشمیر اور پیپلزپارٹی کی رہنما سینیٹر شیری رحمان بھی شریک ہوئیں۔ ذرائع کے مطابق اجلاس میں قومی و داخلی سلامتی کی مجموعی صورتحال پر تفصیلی تبادلہ خیال کیا گیا جبکہ خیبرپختونخوا میں موجودہ سیاسی حالات، امن و امان اور دہشت گردی کے واقعات سے نمٹنے کے اقدامات کا جائزہ لیا گیا۔

اجلاس میں خیبرپختونخوا میں گورنر راج اور ایمرجنسی کے نفاذ سے متعلق معاملات اور اس کے بعد پیدا ہونے والی صورتحال بھی زیر بحث آئی۔ گورنر خیبرپختونخوا فیصل کریم کنڈی نے صوبے کے مختلف شعبوں میں اب تک کیے گئے اقدامات پر شرکاء کو بریفنگ دی۔

اس موقع پر اے آر ڈی سی کی اب تک کی کارکردگی کا بھی جائزہ لیا گیا اور صوبے میں امن و استحکام کے لیے جاری حکومتی اقدامات پر مشاورت کی گئی۔اجلاس میں ملک میں دہشت گردی کے خاتمے کے لیے جاری کارروائیوں اور انٹیلی جنس بنیادوں پر کیے جانے والے آپریشنز کی صورتحال پر تفصیلی گفتگو ہوئی۔

ذرائع کے مطابق سلامتی اجلاس میں فیصلہ کیا گیا کہ دہشت گردی کے خلاف انٹیلی جنس بیسڈ آپریشنز کا دائرہ کار مزید بڑھایا جائے گا تاکہ دہشت گرد عناصر اور ان کے سہولت کاروں کے خلاف مؤثر کارروائیاں جاری رکھی جا سکیں۔

شرکاء نے اس بات پر بھی اتفاق کیا کہ خیبرپختونخوا میں امن و امان کے قیام کے لیے وفاقی اور صوبائی حکومتوں کے متعلقہ اداروں کے درمیان تعاون اور رابطہ کاری کو مزید بہتر بنایا جائے گا۔
خیبرپختونخوا کے لیے 160 ارب روپے کے پیکیج کا جائزہ
سلامتی اجلاس میں وفاقی حکومت کی جانب سے خیبرپختونخوا کے لیے اعلان کردہ 160 ارب روپے کے ترقیاتی و دیگر اقدامات پر مشتمل پیکیج پر عمل درآمد کی صورتحال کا بھی جائزہ لیا گیا۔

شرکاء نے صوبے میں امن و امان کی بہتری، عوامی مسائل کے حل اور حکومتی اقدامات کو مؤثر انداز میں آگے بڑھانے کے حوالے سے مختلف تجاویز پر غور کیا۔

وزیراعظم شہباز شریف نے متعلقہ وفاقی و صوبائی اداروں کو ہدایت کی کہ وہ باہمی رابطہ کاری کو مزید مؤثر بنائیں اور امن و امان کے قیام کے لیے ایک مربوط حکمت عملی کے تحت کام کریں۔

انہوں نے قانون نافذ کرنے والے اداروں کے درمیان تعاون بڑھانے اور دہشت گردی کے خلاف جاری اقدامات میں ہم آہنگی یقینی بنانے پر بھی زور دیا۔ اجلاس میں انتخابی اصلاحات کمیٹی کی تشکیل کے معاملے پر بھی گفتگو کی گئی۔ اس موقع پر سینیٹر شیری رحمان نے پاکستان تحریک انصاف کی قیادت کے ساتھ ہونے والے مذاکرات کے حوالے سے شرکاء کو اعتماد میں لیا۔

ذرائع کے مطابق پیپلزپارٹی کی جانب سے انتخابی اصلاحات کمیٹی میں نمائندگی کے معاملے پر مسلم لیگ (ن) سے لچک دکھانے کی درخواست کی گئی۔

اس پر وزیراعظم شہباز شریف نے انتخابی اصلاحاتی کمیٹی جلد تشکیل دینے کے عزم کا اظہار کیا اور اس معاملے کو آگے بڑھانے پر اتفاق کیا۔

سلامتی اجلاس میں قومی سلامتی، دہشت گردی کے خلاف مشترکہ اقدامات، خیبرپختونخوا میں امن و امان کی بہتری اور سیاسی مشاورت کے ذریعے انتخابی اصلاحات کے عمل کو آگے بڑھانے پر زور دیا گیا۔