پیٹرول اور ڈیزل کی قیمتوں سے متعلق آج اچھی خبر ملے گی، علی پرویز ملک

پیٹرول اور ڈیزل کی قیمتوں سے متعلق آج اچھی خبر ملے گی، علی پرویز ملک

اسلام آباد (3 نومبر 2026): وفاقی وزیر برائے پیٹرولیم علی پرویز ملک نے کہا ہے کہ پیٹرول اور ڈیزل کی قیمتوں کے حوالے سے آج عوام کو اچھی خبر ملے گی، جبکہ حکومت سستے ایندھن کی درآمد اور توانائی کے شعبے میں مسابقت بڑھانے کے لیے اقدامات کر رہی ہے۔

اے آر وائی نیوز کے مطابق وفاقی وزیر علی پرویز ملک نے میڈیا سے گفتگو کرتے ہوئے کہا کہ گزشتہ 50 سال سے پیٹرولیم کے شعبے میں ایک مخصوص گٹھ جوڑ قائم تھا، جس کے ذریعے چند افراد نے اربوں روپے کمائے۔

انہوں نے الزام عائد کیا کہ مخصوص عناصر عدالتی حکم امتناع کے پیچھے چھپ کر پیٹرولیم حکام سے کوٹے حاصل کرتے تھے اور آئل ٹینکرز (باؤزرز) کے کوٹے بھی مانگے جاتے تھے۔

علی پرویز ملک کا کہنا تھا کہ ایسا نہیں ہوسکتا کہ عالمی منڈی میں قیمت ایک ہزار روپے ہو اور مقامی سطح پر ایندھن 500 روپے میں فراہم کیا جائے۔ انہوں نے کہا کہ حکومت فیول کی طرح گیس کے شعبے میں بھی عوام کو ریلیف دینے کے لیے ایسا ہی نظام متعارف کرانے کی کوشش کرے گی۔

وفاقی وزیر نے کہا کہ مسابقتی عمل کے ذریعے بیرون ملک سے سستا ایندھن درآمد کرنا حکومت کی ترجیح ہے۔ حکومت نے فیصلہ کیا ہے کہ شعبے میں مقابلے کی فضا پیدا کی جائے تاکہ مختلف کمپنیوں کے ذریعے کم قیمت پر ایندھن حاصل کیا جاسکے۔

ان کا کہنا تھا کہ گیس کے شعبے کو بھی مسابقت کے لیے کھولنے کا فیصلہ کیا گیا ہے، جبکہ وزیراعظم کی کوشش ہے کہ پورے نظام میں شفافیت لائی جائے۔

علی پرویز ملک نے مزید کہا کہ اگر بیرون ملک سے سستا ایندھن درآمد کرکے عوام کو کم قیمت پر فراہم کیا جاسکتا ہے تو حکومت اس اقدام کو ترجیح دے گی۔

وفاقی وزیر کے بیان کے بعد پیٹرول اور ڈیزل کی قیمتوں میں ممکنہ کمی سے متعلق توقعات بڑھ گئی ہیں، تاہم قیمتوں میں کمی کی حتمی مقدار اور اطلاق کا فیصلہ سرکاری نوٹیفکیشن کے بعد ہی واضح ہوگا۔