نواز شریف کی آزاد کشمیر کا وزیراعظم بننے کی خواہش، کامیابی پر بجٹ 10 گنا بڑھانے کا اعلان

نواز شریف کی آزاد کشمیر کا وزیراعظم بننے کی خواہش، کامیابی پر بجٹ 10 گنا بڑھانے کا اعلان

مظفرآباد: پاکستان مسلم لیگ (ن) کے قائد اور سابق وزیراعظم نواز شریف نے آزاد کشمیر میں انتخابی جلسے سے خطاب کرتے ہوئے کہا ہے کہ اگر مسلم لیگ (ن) انتخابات میں کامیاب ہوئی تو ان کا دل چاہتا ہے کہ وہ وزیراعظم شہباز شریف سے کہیں کہ انہیں آزاد کشمیر کا وزیراعظم بنا دیا جائے۔

مظفرآباد میں عوامی اجتماع سے خطاب کرتے ہوئے نواز شریف نے کہا کہ "میرا دل کرتا ہے کہ اگر الیکشن میں کامیابی ملی تو شہباز شریف سے کہوں کہ مجھے وزیراعظم آزاد کشمیر بنا دیں۔”

انہوں نے آزاد کشمیر کو اپنا دوسرا گھر قرار دیتے ہوئے کہا کہ ان کے لیے آزاد کشمیر اتنا ہی عزیز ہے جتنا پنجاب، اور مسلم لیگ (ن) نے ہمیشہ آزاد کشمیر، گلگت بلتستان اور چاروں صوبوں میں ترقیاتی منصوبوں کے حوالے سے کسی قسم کا امتیاز نہیں برتا۔

حکومت ملی تو تمام مسائل حل کریں گے

نواز شریف نے کہا کہ اگر آزاد کشمیر میں مسلم لیگ (ن) کی حکومت قائم ہوئی تو عوام کے تمام بنیادی مسائل حل کیے جائیں گے۔

انہوں نے کہا کہ اگر عوام انہیں ووٹ دیں گے تو وہ ہر تین ماہ بعد آزاد کشمیر کا دورہ کریں گے اور ترقیاتی منصوبوں کی خود نگرانی کرتے ہوئے عوام کے مسائل سنیں گے۔

بجٹ 10 گنا بڑھانے کا اعلان

مسلم لیگ (ن) کے قائد نے کہا کہ جب وہ پاکستان کے وزیراعظم تھے تو آزاد کشمیر کا بجٹ دوگنا کیا گیا تھا، جبکہ آئندہ حکومت بننے کی صورت میں آزاد کشمیر کا بجٹ 10 گنا تک بڑھایا جائے گا۔

انہوں نے کہا کہ وہ ہمیشہ اپنے وعدے پورے کرتے ہیں اور آزاد کشمیر کی ترقی کے لیے تمام وسائل بروئے کار لائے جائیں گے۔

پنجاب طرز کے منصوبے آزاد کشمیر میں بھی آئیں گے

نواز شریف نے کہا کہ پنجاب میں جاری ترقیاتی منصوبوں میں وزیراعظم شہباز شریف کا اہم کردار ہے جبکہ وزیراعلیٰ پنجاب مریم نواز ان منصوبوں کو کامیابی سے مکمل کر رہی ہیں۔

انہوں نے بتایا کہ پنجاب حکومت کی جانب سے مظفرآباد کے لیے 10 جدید الیکٹرک گرین بسیں تحفے میں دی جا رہی ہیں جو چند روز میں پہنچ جائیں گی۔

ان کا کہنا تھا کہ یہ بسیں ایئرکنڈیشنڈ اور بجلی سے چلنے والی ہیں، جبکہ آزاد کشمیر میں بھی پنجاب کی طرز پر جدید انفراسٹرکچر، موٹرویز اور دیگر ترقیاتی منصوبے متعارف کرائے جائیں گے۔

15 موبائل اسپتال بھی فراہم کیے جائیں گے

نواز شریف نے اعلان کیا کہ پنجاب حکومت آزاد کشمیر کے لیے 15 موبائل اسپتال بھی فراہم کرے گی تاکہ دور دراز علاقوں کے عوام کو بہتر طبی سہولیات میسر آسکیں۔

انہوں نے کہا کہ ان کی حکومت کے بعد آنے والوں نے ملک کو ترقی دینے کے بجائے نقصان پہنچایا، جس سے قیمتی وقت ضائع ہوا۔

عوام کی فلاح اولین ترجیح

مسلم لیگ (ن) کے قائد نے کہا کہ آنے والا وقت عوام کی خوشحالی اور ترقی کا ہوگا۔ انہوں نے کہا کہ اگر عوام نے مسلم لیگ (ن) پر اعتماد کیا تو آزاد کشمیر میں بھی پنجاب کی طرز پر ترقیاتی انقلاب برپا کیا جائے گا، روزگار کے نئے مواقع پیدا ہوں گے، جدید ٹرانسپورٹ، صحت اور انفراسٹرکچر کے منصوبے شروع کیے جائیں گے اور خطے کو ترقی کی نئی راہ پر گامزن کیا جائے گا۔

میرا دل چاہتا ہے کہ آزاد کشمیر میں الیکشن جیت جائیں تو شہباز شریف کو کہوں کہ مجھے آزاد کشمیر کا وزیراعظم بنا دیں۔ نواز شریف pic.twitter.com/21dttb3Y7P
— Ahmad Warraich (@ahmadwaraichh) July 21, 2026