شدید گرمی برقرار، 11 اور 12 جون کو بارشوں کی پیشگوئی، این ڈی ایم اے کا الرٹ

شدید گرمی برقرار، 11 اور 12 جون کو بارشوں کی پیشگوئی، این ڈی ایم اے کا الرٹ، اسلام آباد، خیبرپختونخوا اور شمالی پنجاب کے مختلف علاقوں میں تیز ہواؤں اور بارشوں کا امکان

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے 12 جون تک ملک بھر کی متوقع موسمی صورتحال اور ممکنہ خطرات کے حوالے سے پیشگی جائزہ رپورٹ جاری کر دی ہے، جس میں شدید گرمی کی لہر برقرار رہنے اور بعض علاقوں میں بارشوں کی پیشگوئی کی گئی ہے۔

این ڈی ایم اے کے مطابق آئندہ چند روز کے دوران ملک کے بیشتر علاقوں میں موسم شدید گرم اور خشک رہے گا جبکہ سندھ، جنوبی پنجاب اور بلوچستان میں گرمی کی شدت مزید بڑھنے کا امکان ہے۔

رپورٹ میں بتایا گیا ہے کہ 7 سے 10 جون کے دوران بالائی خیبرپختونخوا، اسلام آباد اور شمالی پنجاب بھی شدید گرمی کی لپیٹ میں رہیں گے۔ وسطی اور جنوبی پنجاب کے مختلف اضلاع میں درجہ حرارت معمول سے کہیں زیادہ رہنے کی توقع ظاہر کی گئی ہے، جس کے باعث ہیٹ ویو جیسی صورتحال پیدا ہو سکتی ہے۔

این ڈی ایم اے کے مطابق 11 اور 12 جون کو موسم کی صورتحال میں جزوی تبدیلی متوقع ہے۔ ان دو دنوں کے دوران اسلام آباد، خیبرپختونخوا اور شمالی پنجاب کے مختلف علاقوں میں تیز ہواؤں اور بارشوں کی پیشگوئی ہے۔

محکمہ کے مطابق راولپنڈی، اٹک، چکوال، جہلم، گجرات، گوجرانوالہ، سیالکوٹ اور لاہور سمیت کئی شہروں میں گرج چمک کے ساتھ بارش متوقع ہے، جس سے گرمی کی شدت میں کچھ کمی آ سکتی ہے۔

دوسری جانب سندھ کے بیشتر اضلاع بشمول کراچی، حیدرآباد، سکھر، لاڑکانہ، میرپورخاص اور تھرپارکر میں موسم گرم اور خشک رہنے کا امکان ہے جبکہ بلوچستان کے شمال مشرقی اضلاع ژوب اور موسیٰ خیل میں 11 اور 12 جون کو گرج چمک کے ساتھ ہلکی بارشوں کی پیشگوئی ہے۔

این ڈی ایم اے نے شہریوں کو شدید گرمی کے دوران احتیاطی تدابیر اختیار کرنے، غیر ضروری طور پر دھوپ میں نکلنے سے گریز کرنے اور زیادہ سے زیادہ پانی پینے کی ہدایت کی ہے۔ اتھارٹی نے متعلقہ اداروں کو بھی ممکنہ موسمی صورتحال سے نمٹنے کے لیے الرٹ رہنے کی ہدایت جاری کی ہے۔

Pakistan Weekly Weather Outlook (09 –15 June 2026)#PakistanWeather #HeatwaveAlert #PMDUpdate #PakistanWeatherForecast #Summer2026 #WeatherUpdate #IslamabadWeather #PunjabWeather #موسم_کی_صورتحال #پاکستان_موسم #گرمی_کی_شدت #محکمہ_موسمیات #بارش_کی_پیشگوئی #گرمی_الرٹ #موساپڈیٹ pic.twitter.com/pGuV3fvODZ
— Pak Met Department محکمہ موسمیات (@pmdgov) June 9, 2026