پیٹرول کی قیمتوں میں کمی کا مکمل ریلیف عوام کو دیا، وفاقی وزیر پٹرولیم

عالمی منڈی سے زیادہ فائدہ عوام کو دیا، پیٹرول کی قیمتوں پر وفاقی وزیر پٹرولیم کا دعویٰ

پیٹرول کی قیمتوں میں کمی کے حوالے سے وفاقی وزیر پٹرولیم علی پرویز ملک نے کہا ہے کہ حکومت نے عالمی منڈی میں آنے والی کمی سے بھی زیادہ فائدہ عوام کو منتقل کیا ہے۔

لاہور میں میڈیا سے گفتگو کرتے ہوئے وفاقی وزیر نے کہا کہ محرم الحرام کا پہلا عشرہ پرامن انداز میں مکمل ہوا، جس پر انہوں نے پاک فوج، وزیراعظم شہباز شریف اور وزیراعلیٰ پنجاب کی کوششوں کو سراہا۔

انہوں نے کہا کہ خطے میں کشیدگی کم ہونے اور ایران امریکا تنازع کے خاتمے کے بعد عالمی منڈی میں پیٹرولیم مصنوعات کی قیمتوں میں کمی دیکھنے میں آئی، جس کے بعد حکومت نے فوری طور پر اس کا فائدہ عوام تک پہنچانے کا فیصلہ کیا۔

علی پرویز ملک کے مطابق گزشتہ ہفتے عالمی منڈی میں جتنی کمی ہوئی، حکومت نے اس سے بڑھ کر ریلیف صارفین کو فراہم کیا۔ ان کا کہنا تھا کہ وزیراعظم شہباز شریف نے فوری اقدام کرتے ہوئے عوامی مفاد کو ترجیح دی۔

وفاقی وزیر نے مزید کہا کہ بعض عناصر پیٹرولیم مصنوعات کی قیمتوں کے حوالے سے عوام کو گمراہ کرنے کی کوشش کر رہے ہیں، تاہم حکومت عالمی معاہدوں اور معاشی ذمہ داریوں کو مدنظر رکھتے ہوئے فیصلے کر رہی ہے۔

انہوں نے اس عزم کا اظہار کیا کہ حکومت آئندہ بھی عالمی مارکیٹ کی صورتحال کا مسلسل جائزہ لے گی اور جہاں ممکن ہوا، عوام کو زیادہ سے زیادہ ریلیف فراہم کرنے کی کوشش جاری رکھے گی۔