دفعہ 144 پنجاب بھر میں نافذ، اجتماعات اور ہتھیاروں کی نمائش پر پابندی

پنجاب بھر میں دفعہ 144 نافذ، اجتماعات اور ہتھیاروں کی نمائش پر پابندی

دفعہ 144 پنجاب بھر میں نافذ کر دی گئی ہے۔ سیکرٹری داخلہ پنجاب نے ضابطہ فوجداری 1898 کی دفعہ 144 (6) کے تحت عوامی اجتماعات پر فوری پابندی کا نوٹیفیکیشن جاری کر دیا ہے، جس کے تحت صوبہ بھر میں جلسے، جلوس، دھرنے اور ہتھیاروں کی نمائش پر مکمل پابندی عائد ہوگی۔

دفعہ 144 کب سے کب تک نافذ رہے گی؟

نوٹیفیکیشن کے مطابق پنجاب بھر میں دفعہ 144 کا نفاذ 23 ستمبر سے 5 اکتوبر تک نافذ العمل رہے گا۔ یعنی یہ پابندی تقریباً دو ہفتوں کی مدت کے لیے لاگو رہے گی۔

کن سرگرمیوں پر پابندی عائد ہوگی؟

نوٹیفیکیشن کے مطابق اس دوران صوبہ بھر میں عوامی مقامات، شاہراہوں یا کسی بھی کھلی جگہ پر 5 یا زائد افراد کے اجتماع، جلسے، جلوس، دھرنے، ریلیاں اور مظاہروں پر مکمل پابندی عائد ہوگی۔

ہتھیاروں کی نمائش پر بھی پابندی

نوٹیفیکیشن کے مطابق عوامی مقامات پر ہر قسم کے ہتھیار لے جانے اور ان کی سرعام نمائش پر بھی پابندی لگائی گئی ہے۔ اس کے علاوہ غیرقانونی اجتماعات میں لوگوں کو شرکت کی دعوت دینے یا ترغیب دینے پر بھی سخت قانونی کارروائی عمل میں لائی جائے گی۔

کن امور پر پابندی کا اطلاق نہیں ہوگا؟

حکومتی احکامات کے تحت دفعہ 144 کی پابندیوں کا اطلاق مندرجہ ذیل روزمرہ اور ضروری امور پر نہیں ہوگا:

• شادی کی تقریبات
• نماز جنازہ اور تدفین کے معاملات
• مساجد، امام بارگاہیں اور دیگر مذہبی عبادت گاہیں اور وہاں ہونے والے معمول کے اجتماعات
• عدالتیں، سرکاری و حکومتی ادارے
• باضابطہ انتظامی اجازت سے منعقد ہونے والی تقریبات
• ڈیوٹی پر تعینات قانون نافذ کرنے والے اداروں، انٹیلیجنس ایجنسیوں اور سکیورٹی اہلکار

دفعہ 144 کیا ہے؟

دفعہ 144 ضابطہ فوجداری 1898 کا ایک حصہ ہے، جو انتظامیہ کو امن و امان کی صورتحال یا کسی ممکنہ خطرے کے پیشِ نظر عوامی اجتماعات، ہتھیاروں کی نمائش یا دیگر مخصوص سرگرمیوں پر عارضی پابندی عائد کرنے کا اختیار دیتی ہے۔ یہ پابندی عموماً کسی خاص مدت کے لیے مخصوص علاقے یا پورے صوبے میں نافذ کی جاتی ہے۔