سوئی گیس کمپنی نے گھریلو کنکشن پر پابندی غیر معینہ مدت تک بڑھا دی

سوئی گیس کمپنی کا گھریلو کنکشن پر پابندی برقرار رکھنے کا فیصلہ، ہزاروں صارفین پریشان

سوئی گیس کمپنی نے گھریلو صارفین کے نئے گیس کنکشن پر عائد پابندی غیر معینہ مدت تک بڑھا دی ہے، جس کے باعث نئے کنکشن کے منتظر ہزاروں صارفین کو مزید انتظار کرنا پڑے گا۔

ذرائع کے مطابق رواں ماہ سے کمرشل تندوروں، ہوٹلوں اور دیگر شعبوں کے نئے کنکشن بھی بند کر دیے گئے ہیں۔ کئی صارفین ارجنٹ فیس جمع کرانے کے باوجود تاحال گیس کنکشن حاصل نہیں کرسکے۔

ذرائع کا کہنا ہے کہ آر ایل این جی کی سپلائی متاثر ہونے کے باعث گیس کی دستیابی کے مسائل میں اضافہ ہوا ہے۔ موجودہ گیس سسٹم میں بھی شارٹ فال بڑھ رہا ہے، جبکہ سردیوں کی آمد کے ساتھ گیس کی طلب میں کئی گنا اضافہ ہو چکا ہے۔

گیس کی بڑھتی ہوئی طلب کے باعث گھریلو صارفین کو بھی فراہمی میں مشکلات کا سامنا ہے۔ ایسے حالات میں نئے کنکشن کی بحالی کمپنی کے لیے مزید چیلنج بن گئی ہے۔

ذرائع کے مطابق ہزاروں صارفین نے نئے کنکشن کے حصول کے لیے ارجنٹ فیس بھی جمع کرا رکھی ہے، تاہم پابندی برقرار رہنے کے باعث انہیں کنکشن فراہم نہیں کیے جا رہے۔

نئے کنکشن کے منتظر صارفین کو یہ خدشہ ہے کہ پابندی غیر معینہ مدت تک بڑھنے سے انہیں مزید طویل انتظار کرنا پڑ سکتا ہے۔

سوئی گیس حکام کے مطابق نئے کنکشن پر پابندی وزارتِ پٹرولیم کی جانب سے عائد کی گئی ہے۔ حکام کا کہنا ہے کہ ایران اور امریکا کے درمیان جنگ رکنے کے بعد ہی کنکشنز کی بحالی کا امکان ہے۔