وسیم اکرم کا پالتو کتا لاپتہ، بازیابی پر 2 لاکھ 50 ہزار روپے انعام

وسیم اکرم اور شنیرا اکرم کا پالتو کتا ڈی ایچ اے کراچی سے لاپتہ، اطلاع دینے والے کیلئے انعام

وسیم اکرم کا پالتو کتا لاپتہ ہونے کے بعد سابق قومی کرکٹر وسیم اکرم اور ان کی اہلیہ شنیرا اکرم نے عوام سے مدد کی اپیل کی ہے۔ دونوں نے اپنے آفیشل انسٹاگرام اکاؤنٹس پر شیئر کی گئی اسٹوری میں بتایا کہ ان کا پانچ ماہ کا بلیک جرمن شیپرڈ، جس کا نام ڈیوک (Duke) ہے، کراچی کے علاقے ڈی ایچ اے فیز 8 سے لاپتہ ہوگیا ہے۔

سوشل میڈیا پر جاری پیغام کے مطابق ڈیوک لانگ کوٹ بلیک جرمن شیپرڈ نسل سے تعلق رکھتا ہے اور اسے آخری مرتبہ ڈی ایچ اے فیز 8 میں دیکھا گیا تھا۔ اس کے بعد سے اس کا کوئی سراغ نہیں مل سکا۔

وسیم اکرم اور شنیرا اکرم نے اپنے پیغام میں بتایا کہ کتے کی بازیابی یا اس کے بارے میں مستند اور قابلِ اعتماد اطلاع فراہم کرنے والے شخص کو 2 لاکھ 50 ہزار روپے بطور انعام دیے جائیں گے۔

انہوں نے ڈی ایچ اے فیز 8 کے رہائشیوں، سیکیورٹی گارڈز، مقامی افراد اور جانوروں سے محبت کرنے والوں سے اپیل کی ہے کہ وہ اپنے اردگرد موجود پارکس، باغات، گلیوں، چھتوں، گیراجز اور دیگر ممکنہ مقامات پر تلاش میں تعاون کریں۔

شنیرا اکرم ماضی میں بھی جانوروں کی فلاح و بہبود اور ویلفیئر سرگرمیوں میں سرگرم کردار ادا کرتی رہی ہیں، جبکہ سوشل میڈیا پر ان کی جانب سے پالتو جانوروں کے حوالے سے آگاہی مہمات بھی چلائی جاتی رہی ہیں۔

اس پوسٹ کے بعد سوشل میڈیا صارفین نے بھی ڈیوک کی جلد اور محفوظ واپسی کے لیے نیک خواہشات کا اظہار کرتے ہوئے پوسٹ کو شیئر کرنا شروع کر دیا ہے تاکہ زیادہ سے زیادہ افراد تک یہ اطلاع پہنچ سکے۔