وزیراعظم صحت کارڈ کا اجرا، حکومت کا عوام کو صحت کی سہولیات دہلیز پر فراہم کرنے کا عزم

وزیراعظم شہباز شریف نے ’’وزیراعظم صحت کارڈ‘‘ کا باضابطہ اجرا کر دیا

وزیراعظم محمد شہباز شریف نے عوام کو صحت کی بہتر سہولیات فراہم کرنے کے لیے ’’وزیراعظم صحت کارڈ‘‘ کا باضابطہ اجرا کر دیا ہے۔ اس حوالے سے ایک تقریب اسلام آباد میں منعقد ہوئی، جس میں وفاقی وزرا، اعلیٰ حکام اور متعلقہ شعبوں سے تعلق رکھنے والے افراد نے شرکت کی۔

تقریب سے خطاب کرتے ہوئے وزیراعظم شہباز شریف نے کہا کہ حکومت عوام کو صحت کی سہولیات ان کی دہلیز تک پہنچانے کے لیے عملی اقدامات کر رہی ہے کیونکہ معیاری صحت کی سہولیات ہر شہری کا بنیادی حق ہیں۔ انہوں نے کہا کہ وزیراعظم صحت کارڈ کے ذریعے عام آدمی کو وہ سہولتیں فراہم کی جائیں گی جو ماضی میں صرف صاحبِ حیثیت طبقے تک محدود تھیں۔

وزیراعظم نے صحت کارڈ کے اجرا پر وفاقی وزیر صحت مصطفیٰ کمال، سیکریٹری صحت اور ان کی پوری ٹیم کو مبارک باد دیتے ہوئے کہا کہ یہ منصوبہ عوامی فلاح و بہبود کی جانب ایک اہم قدم ہے۔ ان کا کہنا تھا کہ ایک فلاحی ریاست کی پہچان یہی ہے کہ وہ اپنے کمزور اور مستحق شہریوں کی بنیادی ضروریات کا خیال رکھے، جن میں صحت سب سے اہم ہے۔

شہباز شریف نے اپنے خطاب میں معاشرتی عدم مساوات کی نشاندہی کرتے ہوئے کہا کہ اشرافیہ طبقہ اپنے اور اپنے بچوں کے لیے مہنگے ترین اسپتالوں میں علاج کرا سکتا ہے، لیکن عام آدمی جو بڑی محنت سے اپنے بچوں کا پیٹ پالتا ہے، اگر وہ کسی بڑی بیماری میں مبتلا ہو جائے تو اکثر بغیر علاج کے ہی دنیا سے رخصت ہو جاتا ہے۔ انہوں نے واضح کیا کہ صحت اور علاج کا حق ہر پاکستانی کا ہے اور حکومت اس حق کو یقینی بنانے کے لیے پرعزم ہے۔

براہِ راست:- وزیراعظم صحت کارڈ کی افتتاحی تقریب کی کارروائی اور وزیراعظم کا خطاب https://t.co/u9ySmWjWZl
— Government of Pakistan (@GovtofPakistan) January 16, 2026
 

وزیراعظم کا کہنا تھا کہ وزیراعظم صحت کارڈ کے تحت علاج کی سہولیات تھرڈ پارٹی کے ذریعے فراہم کی جائیں گی تاکہ شفافیت کو یقینی بنایا جا سکے اور ایک مؤثر چیک اینڈ بیلنس کا نظام قائم رہے۔ انہوں نے کہا کہ اس نظام کے ذریعے کرپشن اور بدانتظامی کی گنجائش ختم کی جائے گی اور مستحق افراد کو حقیقی معنوں میں فائدہ پہنچے گا۔

انہوں نے مزید کہا کہ صحت مند قوم ہی ترقی کی راہ پر گامزن ہو سکتی ہے، کیونکہ اگر شہری صحت مند ہوں گے تو وہ تعلیم، معیشت اور دیگر شعبوں میں بھی بہتر کارکردگی کا مظاہرہ کر سکیں گے۔ وزیراعظم نے اس عزم کا اظہار کیا کہ حکومت مستقبل میں بھی صحت کے شعبے میں مزید اصلاحات اور سہولیات متعارف کرائے گی۔

تقریب کے اختتام پر وزیراعظم نے کہا کہ ’’صحت ہوگی تو ہر میدان میں کامیابی حاصل کی جا سکتی ہے‘‘ اور یہی وژن وزیراعظم صحت کارڈ کے اجرا کی بنیاد ہے۔