سابق گورنر پنجاب عمر سرفراز چیمہ کی 9 مئی جلاؤ گھیراؤ کیس میں ضمانت منظور، کیس کی سماعت اے ٹی سی کے جج منظر علی گل نے کی
لاہور (رئیس الاخبار) :— لاہور کی انسدادِ دہشت گردی عدالت نے 9 مئی کے جلاؤ گھیراؤ کیس میں سابق گورنر پنجاب اور تحریکِ انصاف کے رہنما عمر سرفراز چیمہ کی ضمانت منظور کرلی ہے۔
عمر سرفراز چیمہ کی 9 مئی جلاؤ گھیراؤ کیس میں ضمانت کی سماعت اے ٹی سی کے جج منظر علی گل نے کی، جنہوں نے مغلپورہ میں جلاؤ گھیراؤ اور تشدد کے مقدمے میں بعد از گرفتاری ضمانت کی درخواست منظور کرتے ہوئے فیصلہ سنایا۔
سماعت کے دوران عدالت نے عمر سرفراز چیمہ کی دیگر مقدمات میں دائر ضمانتوں پر کارروائی 25 نومبر تک ملتوی کر دی۔ عمر چیمہ کے خلاف مذکورہ مقدمہ تھانہ مغل پورہ میں درج ہے۔
یاد رہے کہ 9 مئی 2023 کو سابق وزیراعظم عمران خان کی القادر ٹرسٹ کیس میں اسلام آباد ہائی کورٹ سے گرفتاری کے بعد ملک بھر میں شدید احتجاج پھوٹ پڑا تھا، جس میں فوجی، سول اور نجی تنصیبات کو نذرِ آتش کیا گیا تھا۔ ان واقعات میں املاک کو نقصان پہنچا، کم از کم 8 افراد جان سے گئے جبکہ 290 سے زائد زخمی ہوئے۔
لاہور میں مظاہرین نے کور کمانڈر کی رہائش گاہ (جناح ہاؤس) پر دھاوا بولا جبکہ راولپنڈی میں جنرل ہیڈکوارٹرز (جی ایچ کیو) کا ایک گیٹ بھی توڑ دیا گیا تھا۔ بعد ازاں توڑ پھوڑ اور جلاؤ گھیراؤ کے واقعات میں ملوث تقریباً 1900 افراد کو گرفتار کیا گیا، جبکہ عمران خان اور پی ٹی آئی کارکنوں کے خلاف درجنوں مقدمات قائم ہوئے۔
انسداد دہشت گردی عدالت لاہور
عدالت نے سابق گورنر پنجاب عمر سرفراز چیمہ کی ضمانت منظور کرلی
عدالت نے مغلپورہ میں جلاؤ گھیراؤ اور تشدد کے مقدمے میں ضمانت منظور کی
— Ghazanfar Abbas (@ghazanfarabbass) November 18, 2025
