سونے اور چاندی کی قیمتوں میں بڑی کمی، سونا فی تولہ 14 ہزار روپے سستا،فی تولہ چاندی 413 روپے کمی، عالمی و مقامی مارکیٹ متاثر
کراچی: عالمی مالیاتی منڈیوں میں اہم معاشی عوامل کے باعث مسلسل سونے اور چاندی کی قیمتوں میں بڑی کمی کا رجحان برقرار ہے۔ امریکی فیڈرل ریزرو کی جانب سے رواں سال شرح سود میں مزید کمی نہ کرنے کے امکان، عالمی سطح پر امریکی ڈالر کی مضبوطی اور روسی و ترکیہ کے مرکزی بینکوں کی جانب سے گولڈ ذخائر کی فروخت نے قیمتی دھاتوں کی مارکیٹ کو متاثر کیا ہے۔
بین الاقوامی بلین مارکیٹ میں فی اونس سونے کی قیمت میں 149 ڈالر کی بڑی کمی ریکارڈ کی گئی جس کے بعد قیمت 4 ہزار 156 ڈالر کی سطح پر آگئی۔
سونے اور چاندی کی قیمتوں میں بڑی کمی کے اثرات مقامی صرافہ مارکیٹوں پر بھی مرتب ہوئے، جہاں جمعہ کے روز فی تولہ سونے کی قیمت میں 14 ہزار 900 روپے کی نمایاں کمی دیکھی گئی، جس کے بعد نئی قیمت 4 لاکھ 38 ہزار 36 روپے ہوگئی۔ اسی طرح فی 10 گرام سونے کی قیمت بھی 13 ہزار 410 روپے کم ہو کر 3 لاکھ 74 ہزار 205 روپے پر آگئی۔
مزید براں عالمی مارکیٹ میں چاندی کی قیمت میں بھی واضح کمی دیکھی گئی، جہاں فی اونس چاندی 4 ڈالر 13 سینٹس کمی کے بعد 64 ڈالر 67 سینٹس پر آگئی۔
عالمی مارکیٹ میں سونے اور چاندی کی قیمتوں میں بڑی کمی کے رجحان کے باعث مقامی صرافہ مارکیٹوں میں بھی چاندی کی قیمتیں نیچے آگئیں، فی تولہ چاندی 413 روپے کمی کے بعد 6 ہزار 946 روپے جبکہ فی 10 گرام چاندی 373 روپے کمی کے بعد 5 ہزار 895 روپے کی سطح پر پہنچ گئی۔
ماہرین کے مطابق عالمی معاشی غیر یقینی صورتحال اور کرنسی مارکیٹوں میں اتار چڑھاؤ آئندہ دنوں میں بھی قیمتی دھاتوں کی قیمتوں پر اثر انداز ہو سکتا ہے۔
