مریم نواز کا 5000 الیکٹرک بسیں اور ایک لاکھ ای بائیکس دینے کا اعلان

پنجاب میں 5 ہزار الیکٹرک بسیں، ایک لاکھ ای بائیکس اور ای ٹیکسی منصوبہ، مریم نواز کا بڑا اعلان

5000 الیکٹرک بسیں پنجاب میں متعارف کرانے کا اعلان کرتے ہوئے وزیراعلیٰ پنجاب مریم نواز نے کہا ہے کہ آئندہ پانچ برسوں میں جدید، ماحول دوست اور سستی پبلک ٹرانسپورٹ کا وسیع نیٹ ورک قائم کیا جائے گا۔

لاہور میں ٹرانسپورٹ و ماس ٹرانزٹ ڈیپارٹمنٹ کے اجلاس کی صدارت کرتے ہوئے وزیراعلیٰ نے صوبے میں الیکٹرک بسوں کے ساتھ ساتھ ای ٹیکسی، ای بائیکس اور ای تھری وہیلرز متعارف کرانے کی منظوری بھی دی۔

اجلاس میں بریفنگ کے دوران بتایا گیا کہ پنجاب میں الیکٹرک بسوں کا اسمبلنگ پلانٹ کام شروع کر چکا ہے، جس سے مقامی سطح پر الیکٹرک گاڑیوں کی تیاری کو فروغ ملے گا اور روزگار کے نئے مواقع پیدا ہوں گے۔

وزیراعلیٰ نے اعلان کیا کہ آئندہ ایک سال کے دوران ایک لاکھ طلبہ کو ای بائیکس فراہم کی جائیں گی، جبکہ ہر ای بائیک پر پنجاب حکومت 70 ہزار روپے سبسڈی دے گی تاکہ نوجوانوں کو کم لاگت اور ماحول دوست سفری سہولت میسر آ سکے۔

اجلاس کو بتایا گیا کہ طالبات کے لیے خصوصی سہولت کے تحت ای بائیکس کی ڈاؤن پیمنٹ اور رجسٹریشن فیس وزیراعلیٰ پنجاب خود ادا کریں گی، جبکہ سرکاری ملازمین کو بھی آسان اقساط پر ای بائیکس فراہم کی جائیں گی۔

مریم نواز نے کہا کہ پنجاب میں صرف جدید ٹرانسپورٹ نہیں بلکہ الیکٹرک گاڑیوں کی مینوفیکچرنگ انڈسٹری بھی فروغ دی جا رہی ہے، جس سے مقامی معیشت، صنعت اور روزگار کو تقویت ملے گی۔

انہوں نے متعلقہ حکام کو ہدایت کی کہ تمام ترقیاتی منصوبوں کے دوران حفاظتی اقدامات کو یقینی بنایا جائے تاکہ تعمیراتی کام محفوظ اور معیاری انداز میں مکمل ہوں۔