آزاد کشمیر انتخابات: قائم مقام صدر لطیف اکبر پر حملے کی اطلاعات، وزیراعظم اور بلاول کی مذمت، پیپلز پارٹی کے سنگین الزامات

آزاد کشمیر انتخابات: قائم مقام صدر لطیف اکبر پر حملے کی اطلاعات، وزیراعظم اور بلاول کی مذمت، پیپلز پارٹی کے سنگین الزامات

مظفرآباد: آزاد جموں و کشمیر کے قائم مقام صدر چوہدری لطیف اکبر پر مبینہ حملے کی اطلاعات سامنے آنے کے بعد سیاسی صورتحال مزید کشیدہ ہوگئی ہے۔ وزیراعظم شہباز شریف اور پاکستان پیپلز پارٹی کے چیئرمین بلاول بھٹو زرداری نے لطیف اکبر پر حملے کی شدید مذمت کرتے ہوئے ذمہ داروں کے خلاف فوری کارروائی کا مطالبہ کیا ہے۔

پاکستان پیپلز پارٹی کے چیئرمین بلاول بھٹو زرداری نے اپنے بیان میں کہا کہ مسلم لیگ (ن) آزاد کشمیر میں جمہوری روایات کو نقصان پہنچا رہی ہے اور ووٹرز سے لے کر ریاست کے قائم مقام صدر تک پر حملے کیے جا رہے ہیں۔

انہوں نے کہا کہ پیپلز پارٹی نے مظفرآباد ڈویژن میں مبینہ دھونس، دھاندلی اور جبر کا ڈٹ کر مقابلہ کیا اور جمہوری اقدار، رواداری اور اصولی سیاست کے تحت انتخابی عمل میں حصہ لیا۔

بلاول بھٹو زرداری نے کہا کہ آزاد کشمیر کے سینئر سیاست دان اور قائم مقام صدر چوہدری لطیف اکبر پر حملہ انتہائی افسوسناک اور قابل مذمت ہے۔ انہوں نے مطالبہ کیا کہ لطیف اکبر پر حملے میں ملوث عناصر کو فوری گرفتار کرکے قانون کے مطابق سخت سزا دی جائے۔

دوسری جانب وزیراعظم شہباز شریف نے بھی لطیف اکبر پر حملے کی مذمت کرتے ہوئے متعلقہ حکام سے رپورٹ طلب کی اور واقعے کی مکمل تحقیقات کی ہدایت دی۔

ادھر مظفرآباد میں پریس کانفرنس کرتے ہوئے پاکستان پیپلز پارٹی کے سینئر رہنما قمر زمان کائرہ نے الزام عائد کیا کہ آزاد کشمیر انتخابات کے پہلے مرحلے پر تحفظات کے باوجود پارٹی نے دوسرے مرحلے میں بھی حصہ لیا، تاہم ایک مرتبہ پھر انتخابی عمل کو متنازع بنانے کی کوشش کی گئی۔

انہوں نے دعویٰ کیا کہ قائم مقام صدر چوہدری لطیف اکبر پر قاتلانہ حملہ کیا گیا جبکہ پارٹی کے ایک اور کارکن کی شہادت کی اطلاعات بھی موصول ہوئی ہیں۔

قمر زمان کائرہ کا کہنا تھا کہ انتخابات کے آغاز سے ہی امن و امان کی صورتحال تشویشناک رہی اور مرحلہ وار انتخابات پر بھی پیپلز پارٹی کو تحفظات تھے، تاہم اس کے باوجود جمہوری عمل میں حصہ لیا گیا۔

انہوں نے مزید الزام لگایا کہ متعدد پولنگ اسٹیشنوں پر انتخابی عمل تاخیر کا شکار رہا، بعض مقامات پر پولنگ عملہ مقررہ وقت سے کئی گھنٹے بعد پہنچا جبکہ کچھ علاقوں میں انتخابی سامان بھی بروقت فراہم نہیں کیا گیا۔

پیپلز پارٹی رہنما نے کہا کہ اگر انتخابات کا انعقاد ہی متنازع ہو جائے تو نئی حکومت کی ساکھ متاثر ہوگی۔ انہوں نے مؤقف اختیار کیا کہ آزاد کشمیر کے عوام سے ان کا انتخابی حق چھیننے کی کوشش کی گئی ہے۔

واضح رہے کہ ان الزامات پر متعلقہ انتخابی حکام یا دیگر فریقین کی جانب سے باضابطہ ردعمل سامنے آنے کی صورت میں خبر کو مزید اپ ڈیٹ کیا جائے گا۔

آزاد جموں و کشمیر کے صدر اور آزاد جموں و کشمیر قانون ساز اسمبلی کے اسپیکر چوہدری لطیف اکبر پر 

حملے کے خلاف پیپلز پارٹی کی الیکشن کمیشن کو ہنگامی شکایت، فوری کارروائی اور ملزمان کی گرفتاری کا مطالبہ

مظفرآباد: پاکستان پیپلز پارٹی آزاد جموں و کشمیر الیکشن سیل نے حلقہ ایل اے 31 کے… pic.twitter.com/MZzN4mZDQc
— Pakistan Peoples Party - PPP (@PPP_Org) August 2, 2026