وزیراعظم پاکستان شہباز شریف نے ملک میں جاری شدید بارشوں اور دریاؤں میں بلند پانی کی سطح کے باعث سیلابی خطرات پر ہنگامی اجلاس کی صدارت کی۔ اجلاس میں این ڈی ایم اے، پی ڈی ایم اے اور وفاقی وزرا نے بریفنگ دی جبکہ وزیراعظم نے فوری اقدامات، متاثرین کے بروقت انخلا اور ریلیف سرگرمیوں کو مؤثر بنانے کی ہدایات جاری کیں۔
نیشنل ڈیزاسٹر مینجمنٹ اتھارٹی (این ڈی ایم اے) کے مطابق پنجاب کے مختلف اضلاع میں شدید بارشوں اور دریاؤں میں پانی کی سطح بلند ہونے کے باعث اب تک ڈیڑھ لاکھ سے زائد افراد کو محفوظ مقامات پر منتقل کیا جا چکا ہے۔ دریائے ستلج میں پانی کا بہاؤ ایک لاکھ 95 ہزار کیوسک سے بڑھ گیا ہے جو انتہائی اونچے درجے کے سیلاب کی نشاندہی کرتا ہے۔ متاثرین میں سب سے زیادہ تعداد بہاولنگر کی ہے جہاں 89 ہزار سے زائد افراد نقل مکانی کر چکے ہیں۔ قصور، اوکاڑہ، پاکپتن، بہاولپور اور وہاڑی کے نشیبی علاقے بھی متاثر ہوئے ہیں۔ وزیراعلیٰ پنجاب مریم نواز نے سخت احکامات جاری کرتے ہوئے کہا کہ انسانی جانوں کے تحفظ میں کوئی کوتاہی برداشت نہیں کی جائے گی۔ ماہرین کے مطابق یہ صورتحال ماحولیاتی تبدیلیوں کا نتیجہ ہے، جس نے پاکستان کو دنیا کے سب سے زیادہ متاثرہ ممالک میں شامل کر دیا ہے۔
وزیراعظم شہباز شریف سے ایئرچیف مارشل ظہیر احمد بابر سدھو نے اہم ملاقات کی جس میں پاک فضائیہ کے پیشہ وارانہ امور اور ملکی دفاع کے حوالے سے تفصیلی تبادلہ خیال ہوا۔ وزیراعظم نے پاک فضائیہ کے شاہینوں کو خراج تحسین پیش کرتے ہوئے کہا کہ وہ وطن عزیز کے تحفظ کے لیے سیسہ پلائی دیوار ہیں۔
سیلاب سے متاثرہ گاؤں شائی درہ میں مکانات، مارکیٹ اور اسکول تباہ، سڑکیں ٹوٹنے سے امداد رُک گئی۔ حکومت اور مقامی رضاکار بحالی میں مصروف ہیں۔
سعودی عرب کے شہر جدہ میں او آئی سی وزرائے خارجہ کونسل کا غیر معمولی اجلاس آج ہو رہا ہے، جس میں وزیر خارجہ اسحاق ڈار پاکستان کی نمائندگی کر رہے ہیں۔ اجلاس میں فلسطین کی صورتحال اور اسرائیلی مظالم کے خلاف مسلم دنیا کے مشترکہ لائحہ عمل پر غور کیا جائے گا۔
پاکستان کے نائب وزیراعظم و وزیر خارجہ اسحاق ڈار نے ڈھاکا میں چیف ایڈوائزر پروفیسر محمد یونس سمیت اہم رہنماؤں سے ملاقاتیں کیں۔ دونوں ممالک نے تعلقات کو نئے عزم کے ساتھ مزید مستحکم بنانے، تعلیمی و تجارتی تعاون بڑھانے اور عوامی روابط فروغ دینے پر اتفاق کیا۔ فلسطین اور روہنگیا مسلمانوں پر مظالم کی بھی مذمت کی گئی۔
اسلام آباد میں پاک فوج کے سپہ سالار فیلڈ مارشل سید عاصم منیر اور چین کے وزیر خارجہ وانگ ژی کی اہم ملاقات میں کہا گیا کہ پاک–چین تعلقات چٹان کی طرح مضبوط ہیں۔ ملاقات میں سی پیک، علاقائی سلامتی اور عسکری تعاون پر تفصیلی گفتگو ہوئی۔ دونوں رہنماؤں نے اسٹریٹجک شراکت داری کو مزید گہرا کرنے کے عزم کا اظہار کیا۔
قابل تقسیم مالی وسائل کی تقسیم کے لیے گیارہواں قومی مالیاتی کمیشن (این ایف سی) اجلاس 29 اگست کو طلب کر لیا گیا ہے۔ ذرائع کے مطابق وفاقی حکومت صوبوں کو مالیاتی اعداد و شمار، قرض پر سود، انسداد دہشت گردی اور دفاعی اخراجات سے آگاہ کرے گی۔ اجلاس میں بی آئی ایس پی سمیت دیگر بڑے اخراجات پر بھی مشاورت ہوگی۔ وزارتی کمیٹی پہلے ہی نئی حکمت عملی تیار کرچکی ہے، جبکہ اجلاس میں صوبوں اور مرکز کے درمیان حصے کا تعین کلیدی موضوع ہوگا۔ توقع کی جا رہی ہے کہ یہ اجلاس ہنگامہ خیز ثابت ہوگا کیونکہ ماضی میں صرف چار این ایف سی ایوارڈ نتیجہ خیز رہے ہیں۔
ڈھاکا میں نائب وزیراعظم و وزیر خارجہ اسحاق ڈار اور بنگلہ دیشی مشیر خارجہ کی ملاقات میں دونوں ممالک نے تعلقات کو مزید مستحکم کرنے اور تجارت، تعلیم، ثقافت اور خطے میں تعاون کو فروغ دینے پر اتفاق کیا۔
کراچی میں سی ٹی ڈی اور حساس اداروں کی بڑی کارروائی کے دوران بھارتی خفیہ ایجنسی "را” کا دہشت گرد نیٹ ورک بے نقاب ہو گیا۔ گرفتار ملزمان نے دورانِ تفتیش ٹارگٹ کلنگ، فنڈنگ اور علیحدگی پسند تنظیموں کے ساتھ روابط کا اعتراف کیا۔ حکام کے مطابق یہ نیٹ ورک کئی برسوں سے کراچی سمیت مختلف شہروں میں سرگرم تھا۔
وزیراعظم شہباز شریف نے وفاقی کابینہ کے اجلاس میں کہا ہے کہ حالیہ بارشوں اور سیلاب سے متاثرہ عوام کی مکمل بحالی تک چین سے نہیں بیٹھیں گے۔ وفاق اور صوبے مل کر امدادی سرگرمیوں میں مصروف ہیں، جبکہ پاک فوج اور این ڈی ایم اے متاثرہ علاقوں میں ریلیف آپریشنز جاری رکھے ہوئے ہیں۔
اسلام آباد: وزیراعظم شہباز شریف اور چینی وزیر خارجہ وانگ ژی کی اہم ملاقات میں سی پیک کے دوسرے مرحلے، دوطرفہ تعاون اور خطے میں امن پر زور دیا گیا۔ دونوں رہنماؤں نے پاکستان اور چین کی "آہنی دوستی” اور ہر موسم کی اسٹریٹجک شراکت داری پر مکمل اعتماد کا اظہار کیا۔
وفاقی وزیر اطلاعات عطا اللہ تارڑ نے کہا ہے کہ عمران خان 190 ملین پاؤنڈ میگا کرپشن کیس میں ملوث ہیں، ضمانت ملنے کا مطلب بریت نہیں، شواہد کی بنیاد پر انہیں 14 سال قید کی سزا سنائی گئی۔
سپریم کورٹ نے 9 مئی کے واقعات سے متعلق 8 مقدمات میں بانی چیئرمین پی ٹی آئی عمران خان کی ضمانت منظور کرتے ہوئے رہائی کا حکم دے دیا۔ چیف جسٹس یحییٰ آفریدی کی سربراہی میں تین رکنی بینچ نے فیصلہ سنایا۔
کراچی میں دو روز کی طوفانی بارشوں نے نظامِ زندگی مفلوج کردیا۔ 245 ملی میٹر بارش کے بعد سڑکیں زیرِ آب، بجلی اور انٹرنیٹ سروس معطل، ٹریفک جام سے شہری پریشان جبکہ مختلف حادثات میں 15 افراد جان کی بازی ہار گئے۔ سیاسی جماعتوں اور شہریوں نے کراچی کو "آفت زدہ علاقہ” قرار دینے کا مطالبہ کر دیا۔
چھبیسویں آئینی ترمیم کے بعد سپریم کورٹ کے اندر اختلافات کھل کر سامنے آگئے ہیں۔ جسٹس منصور علی شاہ اور جسٹس منیب اختر نے چیف جسٹس یحییٰ آفریدی کو کھلا خط لکھتے ہوئے کہا ہے کہ فل کورٹ تشکیل دینے کا فیصلہ نظرانداز کیا گیا جو واحد حل تھا۔
کابل میں پاکستان، چین اور افغانستان کے وزرائے خارجہ کے درمیان سہ فریقی مذاکرات شروع ہو گئے ہیں۔ ان مذاکرات کا مقصد علاقائی امن، دہشت گردی کا خاتمہ اور افغانستان کو سی پیک میں شامل کرنے کے امکانات پر غور ہے۔ پاکستان کی نمائندگی اسحاق ڈار جبکہ چین اور افغان وزرائے خارجہ نے بھی شرکت کی۔
وزیراعظم شہباز شریف اور فیلڈ مارشل عاصم منیر نے خیبر پختونخوا کے سیلاب متاثرہ اضلاع کا دورہ کیا، متاثرین سے ملاقات کی اور امدادی چیکس تقسیم کیے۔ فوج اور سول ادارے ریلیف آپریشن میں مشترکہ کردار ادا کر رہے ہیں جبکہ وزیراعظم نے متاثرین کو فوری امداد اور بحالی کی یقین دہانی کرائی۔
کراچی میں ریکارڈ توڑ بارش نے نظام زندگی کو مفلوج کردیا، شہر کی اہم شاہراہیں ندی نالوں کا منظر پیش کرنے لگیں، گھروں میں پانی داخل ہوگیا۔ مختلف واقعات میں 4 بچوں سمیت 5 افراد جاں بحق ہوئے جبکہ اربن فلڈنگ اور بجلی کے بحران نے شہریوں کو شدید مشکلات میں ڈال دیا۔
عمران خان 9 مئی ضمانت اپیلوں پر سپریم کورٹ کی سماعت، چیف جسٹس یحییٰ آفریدی نے فریقین کو آج ہی تمام دستاویزات جمع کرانے کی ہدایت کی۔ سماعت کل تک ملتوی۔
اسلام آباد میں وزیرِ اعظم شہباز شریف کی زیر صدارت اعلیٰ سطح اجلاس میں خیبرپختونخوا، گلگت بلتستان اور آزاد کشمیر کے سیلاب متاثرین کے لیے امدادی اقدامات کا جائزہ لیا گیا۔ وزیرِ اعظم نے کابینہ ارکان کی ایک ماہ کی تنخواہ عطیہ کرنے کا اعلان کیا اور وفاقی اداروں کو متاثرہ علاقوں میں بجلی، سڑکوں، صحت اور دیگر سہولیات فوری بحال کرنے کی ہدایت دی۔ این ڈی ایم اے کے مطابق 456 ریلیف کیمپس قائم اور 400 ریسکیو آپریشن مکمل کیے جا چکے ہیں۔
کوئٹہ میں سیکیورٹی فورسز نے بیوٹم یونیورسٹی کے لیکچرار ڈاکٹر عثمان قاضی کو گرفتار کر لیا، جنہوں نے اپنے اعترافی بیان میں کالعدم بی ایل اے سے روابط اور دہشت گردوں کی سہولت کاری کا اعتراف کیا۔ وزیر اعلیٰ بلوچستان سرفراز بگٹی نے انکشاف کیا کہ یوم آزادی پر بڑا دہشت گرد حملہ ناکام بنایا گیا ہے۔
خیبر پختونخوا، گلگت بلتستان اور آزاد کشمیر میں شدید بارشوں اور سیلابی ریلوں نے تباہی مچا دی۔ اب تک 340 سے زائد افراد جاں بحق، درجنوں زخمی اور سینکڑوں بے گھر ہوچکے ہیں جبکہ بونیر اور سوات کے کئی گاؤں مکمل طور پر مٹ گئے۔
ڈان نیوز کراچی کے سینئر رپورٹر خاور حسین کی لاش سانگھڑ کے ایک ہوٹل کی پارکنگ سے برآمد ہوئی، جس نے کئی سوالات کو جنم دیا ہے۔ پولیس نے مختلف پہلوؤں سے تحقیقات شروع کردی ہیں جبکہ صحافتی برادری نے شفاف تحقیقات کا مطالبہ کیا ہے۔
وزیراعظم شہباز شریف کی زیر صدارت ہنگامی اجلاس میں ملک میں بارشوں اور سیلاب کی صورتحال کا جائزہ لیا گیا، متاثرہ علاقوں میں فوری ریسکیو اور ریلیف آپریشن کے اقدامات تیز کرنے کی ہدایات جاری کی گئیں۔
| فجر | 04:54 AM |
| طلوع آفتاب | 06:17 AM |
| ظہر | 11:53 AM |
| عصر | 03:02 PM |
| مغرب | 05:28 PM |
| عشاء | 06:51 PM |