فیلڈ مارشل کی زیر صدارت کور کمانڈرز کانفرنس، بھارت ہائبرڈ وارفیئر کے ذریعے پاکستان میں بدامنی پھیلانے کی کوشش کر رہا

فیلڈ مارشل عاصم منیر کی زیر صدارت کور کمانڈرز کانفرنس، بھارت ہائبرڈ وارفیئر، جھوٹے بیانیوں اور پراکسی عناصر کے ذریعے پاکستان میں بدامنی پھیلانے کی کوشش کر رہا ہے

راولپنڈی: چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر کی زیر صدارت 276ویں کور کمانڈرز کانفرنس میں قومی سلامتی، دہشت گردی، خطے کی صورتحال اور بھارت کی مبینہ ہائبرڈ وارفیئر حکمت عملی کا تفصیلی جائزہ لیا گیا۔ کانفرنس میں شہدائے وطن کی لازوال قربانیوں کو خراجِ عقیدت پیش کرتے ہوئے ان کے ایصالِ ثواب کے لیے فاتحہ خوانی بھی کی گئی۔

پاک فوج کے شعبہ تعلقات عامہ (آئی ایس پی آر) کے مطابق فورم نے اس عزم کا اعادہ کیا کہ افواجِ پاکستان ملک کی سلامتی، اتحاد اور استحکام کے تحفظ کے لیے ہر ممکن اقدام جاری رکھیں گی۔

بھارت پر ہائبرڈ وارفیئر اور دہشت گردی کی حمایت کا الزام

کور کمانڈرز کانفرنس میں کہا گیا کہ "معرکہ حق” میں ناکامی کے بعد بھارت ہائبرڈ وارفیئر، جھوٹے بیانیوں اور پراکسی عناصر کے ذریعے پاکستان میں بدامنی پھیلانے کی کوشش کر رہا ہے۔

فورم نے واضح کیا کہ بیرونی سرپرستی میں انتشار اور دہشت گردی پھیلانے کی ہر کوشش کو بلاامتیاز اور پوری قوت سے ناکام بنایا جائے گا۔

افغان سرزمین کے استعمال پر تشویش

کانفرنس میں افغان طالبان کے زیرِ انتظام علاقوں سے پاکستان کے خلاف بھارتی حمایت یافتہ دہشت گرد گروہوں کی سرگرمیوں پر شدید تشویش کا اظہار کیا گیا۔

شرکا نے کہا کہ خطے میں پائیدار امن اسی صورت ممکن ہے جب افغان سرزمین پاکستان کے خلاف دہشت گردی کے لیے استعمال نہ ہو، اور یہ ذمہ داری افغان حکام پر عائد ہوتی ہے۔

آپریشن "غضب للحق” جاری رکھنے کا عزم

فورم نے کہا کہ پاکستان کو اپنی عوام کے تحفظ کا مکمل حق حاصل ہے اور آپریشن غضب للحق کے تحت انٹیلی جنس بنیادوں پر دہشت گردوں کے خلاف کارروائیاں جاری رہیں گی۔

کانفرنس میں اس امر پر بھی زور دیا گیا کہ دہشت گردی سے متاثرہ علاقوں میں مؤثر گورننس، عوامی فلاح اور مضبوط انتظامی ڈھانچہ قائم کرنا ناگزیر ہے تاکہ جرائم اور دہشت گردی کے گٹھ جوڑ کا خاتمہ کیا جا سکے۔

سندھ طاس معاہدہ اور کشمیر پر واضح مؤقف

کور کمانڈرز کانفرنس میں بھارت کی جانب سے سندھ طاس معاہدے سے متعلق حالیہ بیانات کا بھی جائزہ لیا گیا۔ فورم نے کہا کہ قومی سلامتی کمیٹی کی 24 اپریل 2025 کی ہدایات اس حوالے سے واضح رہنمائی فراہم کرتی ہیں۔

اعلامیے کے مطابق افواجِ پاکستان حکومت کی پالیسی اور عوام کی خواہشات کے مطابق پاکستان کے جائز آبی حقوق کے تحفظ کے لیے ہر ضروری اقدام کرنے کے لیے تیار ہیں۔

شرکا نے ایک بار پھر اس مؤقف کا اعادہ کیا کہ کشمیر پاکستان کی شہ رگ ہے اور خطے میں پائیدار امن اقوام متحدہ کی قراردادوں کے مطابق کشمیری عوام کو حقِ خودارادیت ملنے سے ہی ممکن ہے۔

ملٹی ڈومین ٹرانسفارمیشن پلان پر عمل تیز کرنے کی ہدایت

کانفرنس سے خطاب کرتے ہوئے فیلڈ مارشل سید عاصم منیر نے تمام فارمیشن کمانڈرز کو ہدایت کی کہ جنگ کے بدلتے تقاضوں کے مطابق ملٹی ڈومین ٹرانسفارمیشن پلان پر عملدرآمد مزید تیز کیا جائے اور پاکستان کی خودمختاری، سلامتی اور قومی مفادات کا ہر قیمت پر تحفظ یقینی بنایا جائے۔

#ISPR
Rawalpindi, 6 July, 2026

Field Marshal Syed Asim Munir, NI (M), HJ, Chief of Army Staff (COAS) & Chief of Defence Forces (CDF) of Pakistan, presided over the 276th Corps Commanders’ Conference (CCC) at General Headquarters (GHQ), Rawalpindi.

The Forum offered fateha for… pic.twitter.com/oCrm2bJW9h
— Pakistan Armed Forces News 🇵🇰 (@PakistanFauj) July 6, 2026