ایف بی آر کا کسٹمز اینٹی اسمگلنگ نظام میں بڑا فیصلہ، سپرنٹنڈنٹس کے اختیارات محدود، کمانڈ اے سی اور ڈی سی کے سپرد

ایف بی آر کا کسٹمز اینٹی اسمگلنگ نظام میں بڑا فیصلہ، سپرنٹنڈنٹس کے اختیارات محدود، کمانڈ اے سی اور ڈی سی کے سپرد

اسلام آباد: فیڈرل بورڈ آف ریونیو (ایف بی آر) نے کسٹمز کے اینٹی اسمگلنگ آرگنائزیشنز (ASOs) کے انتظامی اور آپریشنل نظام میں بڑی تبدیلی کرتے ہوئے ان کی کمانڈ اسسٹنٹ کلکٹرز اور ڈپٹی کلکٹرز کے حوالے کرنے کا فیصلہ کر لیا ہے۔ نئے احکامات کے تحت سپرنٹنڈنٹس اور سینئر پریونٹو افسران کے روایتی نگران کردار کو ختم کر دیا گیا ہے، جبکہ اینٹی اسمگلنگ اسکواڈز اب براہِ راست اے سی یا ڈی سی کو جواب دہ ہوں گے۔

چیف کلکٹر آف کسٹمز (انفورسمنٹ) کے دفتر کے مطابق اس فیصلے کا مقصد اینٹی اسمگلنگ کارروائیوں کو زیادہ مؤثر، منظم اور جواب دہ بنانا ہے۔ نئی ہدایات چیف کلکٹر آف کسٹمز (انفورسمنٹ) کی منظوری سے جاری کی گئی ہیں۔

نوٹیفکیشن میں کہا گیا ہے کہ ماضی میں اینٹی اسمگلنگ آرگنائزیشنز سپرنٹنڈنٹس اور سینئر پریونٹو افسران کی نگرانی میں کام کرتی رہی ہیں، تاہم مخصوص انفورسمنٹ کلکٹریٹس، ڈیجیٹل انفورسمنٹ اسٹیشنز (DESs) اور رسک بیسڈ نظام متعارف ہونے کے بعد آپریشنل کمانڈ کے ڈھانچے میں تبدیلی ضروری ہوگئی تھی۔

دستاویز میں ٹرانسپورٹرز، بس ٹرمینلز اور دیگر متعلقہ حلقوں کی جانب سے غیر مجاز چیکنگ اور مبینہ بھتہ خوری کی مسلسل شکایات کا بھی ذکر کیا گیا ہے۔ نوٹیفکیشن کے مطابق ان شکایات سے کسٹمز کے ادارہ جاتی تشخص کو نقصان پہنچا، جس کے پیش نظر اینٹی اسمگلنگ کارروائیوں کی نگرانی اور جواب دہی کا نظام تبدیل کرنے کا فیصلہ کیا گیا۔

نئے انتظامی ڈھانچے کے تحت ہر اینٹی اسمگلنگ آرگنائزیشن کا سربراہ متعلقہ کلکٹر کی جانب سے نامزد کردہ اسسٹنٹ کلکٹر یا ڈپٹی کلکٹر ہوگا۔ یہ افسر آپریشنز کے ساتھ ساتھ ادارے کے مجموعی طرزِ عمل اور انتظامی کارکردگی کا بھی براہِ راست ذمہ دار ہوگا۔

احکامات کے مطابق اینٹی اسمگلنگ اسکواڈز کی سربراہی انسپکٹرز یا پریونٹو افسران کریں گے، جبکہ اسکواڈ انچارج براہِ راست متعلقہ اے سی یا ڈی سی کو رپورٹ کریں گے۔ اسکواڈز اور اعلیٰ افسران کے درمیان کوئی درمیانی انتظامی سطح نہیں ہوگی۔

نئے نظام کے تحت تمام تعیناتیوں، ناکہ بندیوں اور چیکنگ پوائنٹس کی منظوری متعلقہ اسسٹنٹ کلکٹر یا ڈپٹی کلکٹر سے لینا لازمی ہوگا۔ اسی طرح کسی بھی شخص کو حراست میں لینے یا سامان ضبط کرنے کی کارروائی کی اطلاع فوری طور پر متعلقہ اے سی یا ڈی سی کو دینا ہوگی۔

ایف بی آر نے سپرنٹنڈنٹس اور سینئر پریونٹو افسران کے تجربے اور پیشہ ورانہ صلاحیتوں کو اہم قرار دیتے ہوئے ان کی ذمہ داریوں کا دائرہ بھی متعین کر دیا ہے۔ نئے احکامات کے مطابق یہ افسران قانونی معاونت، استغاثہ، مقدمات کی تیاری، عدالتی کارروائیوں اور ضبط شدہ سامان کی نیلامی جیسے امور انجام دیں گے۔

تاہم ضرورت پڑنے پر کسی سپرنٹنڈنٹ یا سینئر پریونٹو افسر کو اینٹی اسمگلنگ آپریشن میں اسکواڈ انچارج کے طور پر تعینات کیا جا سکے گا، لیکن ایسی صورت میں بھی وہ متعلقہ اے سی یا ڈی سی کی براہِ راست نگرانی میں کام کرے گا۔ انہیں کسی بھی اسکواڈ پر آزادانہ یا بالواسطہ نگرانی کا اختیار حاصل نہیں ہوگا۔

نوٹیفکیشن میں تمام متعلقہ کلکٹرز کو ہدایت کی گئی ہے کہ نئے انتظامی احکامات پر ان کی اصل روح کے مطابق عمل درآمد یقینی بنایا جائے۔ تمام کلکٹرز کو سات روز کے اندر چیف کلکٹر کے دفتر میں تعمیلی رپورٹ جمع کرانے کا پابند کیا گیا ہے، جس میں انتظامی تبدیلیوں اور اینٹی اسمگلنگ آپریشنز کی نئی حکمت عملی کی تفصیلات فراہم کرنا ہوں گی۔

ایف بی آر کے اس فیصلے کے بعد کسٹمز کے اینٹی اسمگلنگ آپریشنز میں کمانڈ، منظوری اور جواب دہی کا نظام براہِ راست اے سی اور ڈی سی کی سطح پر منتقل ہو جائے گا، جبکہ سپرنٹنڈنٹس اور سینئر پریونٹو افسران کی توجہ قانونی اور عدالتی امور پر مرکوز ہوگی۔

ایف بی آر کا کسٹمز اینٹی اسمگلنگ نظام میں بڑا آپریشنل فیصلہ، مبینہ بھتہ خوری اور غیر قانونی چیکنگ کی شکایات پر نگرانی کا نظام تبدیل

فیڈرل بورڈ آف ریونیو (ایف بی آر) نے کسٹمز اینٹی اسمگلنگ آرگنائزیشنز میں سپرنٹنڈنٹس اور سینئر پریونٹو افسران کے روایتی نگران اختیارات ختم کر دیے۔
13 نومبر 2026 کو جاری نوٹیفکیشن کے مطابق اب تمام اینٹی اسمگلنگ اسکواڈز براہِ راست اسسٹنٹ کلکٹر یا ڈپٹی کلکٹر کی نگرانی میں کام کریں گے۔ ناکہ بندی، چیکنگ پوائنٹس اور فیلڈ آپریشنز کی منظوری بھی متعلقہ افسر دے گا۔
نوٹیفکیشن میں ٹرانسپورٹرز اور بس ٹرمینلز کی جانب سے غیر مجاز چیکنگ اور مبینہ بھتہ خوری کی مسلسل شکایات کا اعتراف کرتے ہوئے انہیں کسٹمز کے ادارہ جاتی تشخص کے لیے نقصان دہ قرار دیا گیا ہے۔
سپرنٹنڈنٹس اور سینئر پریونٹو افسران کو قانونی امور، مقدمات، عدالتی کارروائیوں اور ضبط شدہ سامان کی نیلامی کی ذمہ داریاں سونپی جائیں گی۔
تمام متعلقہ کلکٹرز کو نئے احکامات پر فوری عمل درآمد اور سات روز میں چیف کلکٹر کو تعمیلی رپورٹ پیش کرنے کی ہدایت جاری کر دی گئی۔

@FBRSpokesperson @Pak_Customs @Jamilnasir1
— Shahnawaz Khan (@shahnawazk33) November 14, 2026