عمران خان سخت سکیورٹی میں اڈیالہ جیل سے شفا انٹرنیشنل اسپتال منتقل

عمران خان سخت سکیورٹی میں اڈیالہ جیل سے شفا انٹرنیشنل اسپتال منتقل

راولپنڈی: بانی پی ٹی آئی عمران خان کو سخت سکیورٹی حصار میں اڈیالہ جیل سے اسلام آباد کے شفا انٹرنیشنل اسپتال منتقل کر دیا گیا۔

ذرائع کے مطابق پولیس بانی پی ٹی آئی کو لے کر اڈیالہ جیل سے اسلام آباد روانہ ہوئی۔ عمران خان کو اڈیالہ جیل کے گیٹ نمبر ایک سے سخت سکیورٹی انتظامات کے تحت اسپتال منتقل کیا گیا۔

ذرائع کا کہنا ہے کہ عمران خان کی اسپتال منتقلی کے پیش نظر سکیورٹی کے غیر معمولی انتظامات کیے گئے ہیں، جبکہ شفا انٹرنیشنل اسپتال کے باہر پولیس کی بھاری نفری بھی تعینات کر دی گئی ہے۔

اس سے قبل آئی جی اسلام آباد نے پولیس افسران کے ہمراہ شفا انٹرنیشنل اسپتال کا دورہ کیا اور وہاں سکیورٹی انتظامات کا جائزہ لیا۔ اسپتال میں بانی پی ٹی آئی کی آمد کے پیش نظر خصوصی انتظامات مکمل کیے گئے۔

6 ماہر ڈاکٹروں پر مشتمل ٹیم چیک اپ کرے گی

شفا انٹرنیشنل اسپتال کے ذرائع کے مطابق بانی پی ٹی آئی عمران خان کے طبی معائنے کے لیے خصوصی انتظامات کیے گئے ہیں۔ اسپتال پہنچنے کے بعد عمران خان کا تفصیلی چیک اپ کیا جائے گا۔

ذرائع کے مطابق 6 ماہر ڈاکٹروں پر مشتمل میڈیکل ٹیم بانی پی ٹی آئی کا معائنہ کرے گی، جس کے بعد ان کی صحت کی صورتحال اور مزید علاج سے متعلق فیصلہ کیا جائے گا۔

ذرائع کا کہنا ہے کہ طبی معائنے کے بعد یہ فیصلہ بھی کیا جائے گا کہ عمران خان کو اسپتال میں داخل کرنے کی ضرورت ہے یا انہیں چیک اپ کے بعد واپس منتقل کیا جائے۔

اگر عمران خان کو اسپتال میں داخل کرنے کا فیصلہ کیا گیا تو اس صورت میں بھی سکیورٹی سمیت دیگر خصوصی انتظامات مکمل کر لیے گئے ہیں۔

سپریم کورٹ کے حکم کے بعد پیش رفت

یاد رہے کہ سپریم کورٹ نے بانی پی ٹی آئی عمران خان کو شفا انٹرنیشنل اسپتال منتقل کرنے کا حکم دیا تھا۔ حکومت نے اس حکم کے خلاف نظرثانی درخواست دائر کی تھی۔

جمعرات کی صبح سپریم کورٹ کے رجسٹرار آفس نے بانی پی ٹی آئی کی اسپتال منتقلی کے خلاف گزشتہ روز دائر کی گئی نظرثانی درخواست بعض اعتراضات عائد کرتے ہوئے واپس کر دی۔

دوسری جانب وفاقی وزیر طارق فضل چودھری نے بانی پی ٹی آئی عمران خان کو بیرونِ ملک بھیجے جانے کے امکان کا بھی عندیہ دیا ہے، تاہم اس حوالے سے حتمی فیصلہ سامنے نہیں آیا۔

عمران خان کی شفا انٹرنیشنل اسپتال منتقلی کے بعد ان کے طبی معائنے، ممکنہ داخلے اور سکیورٹی انتظامات پر سیاسی حلقوں اور عوام کی نظریں مرکوز ہیں۔

Former Pakistan Prime Minister and PTI founder Imran Khan has been shifted from Adiala Jail to Shifa International Hospital in Islamabad under tight security, according to sources.
عمران خان کو سخت سکیورٹی میں شفا انٹرنیشنل اسپتال منتقل کر دیا گیا.#ImranKhan #PTI #Pakistan pic.twitter.com/SalYXPCaa0
— Raees ul Akhbar (@raeesulakhbar1) August 20, 2026