مسلم دنیا کی 500 بااثر شخصیات: شہباز شریف اور عاصم منیر پہلے نمبر پر

اردن کے رائل اسلامک اسٹریٹجک اسٹڈیز سینٹر نے مسلم دنیا کی 500 بااثر شخصیات کی فہرست جاری کردی ہے، جس میں وزیراعظم پاکستان شہباز شریف اور فیلڈ مارشل عاصم منیر کو مشترکہ طور پر پہلی پوزیشن دی گئی ہے۔

جاری کردہ فہرست کے مطابق مسلم دنیا کی بااثر ترین شخصیات میں پاکستان کی اہم سیاسی اور عسکری قیادت کو نمایاں مقام حاصل ہوا ہے۔ اس فہرست میں سعودی فرمانروا شاہ سلمان بن عبدالعزیز اور سعودی ولی عہد محمد بن سلمان کو بھی مشترکہ طور پر پہلی پوزیشن دی گئی ہے۔

رپورٹ کے مطابق پہلی مرتبہ پانچ شخصیات کو مشترکہ طور پر پہلی پوزیشن کے لیے منتخب کیا گیا ہے، جو اس فہرست کے حوالے سے ایک نمایاں پیش رفت ہے۔

فہرست میں ترکیہ کے صدر رجب طیب اردوان بھی مسلم دنیا کی پانچ بااثر ترین شخصیات میں شامل ہیں، جبکہ ایران کے سپریم لیڈر آیت اللہ مجتبیٰ خامنہ ای نے چوتھی پوزیشن حاصل کی ہے۔

اردن کے شاہ عبداللہ دوم فہرست میں پانچویں اور قطر کے امیر شیخ تمیم بن حمد آل ثانی چھٹی پوزیشن پر موجود ہیں۔

اس کے علاوہ متحدہ عرب امارات کے صدر شیخ محمد بن زاید، ملائیشیا کے وزیراعظم انور ابراہیم اور مراکش کے شاہ محمد ششم کو بھی مسلم دنیا کی بااثر شخصیات میں شامل کیا گیا ہے۔

مسلم دنیا کی 500 بااثر شخصیات کی فہرست میں انڈونیشیا کے صدر پرابووو سوبیانتو، مصر کے صدر عبدالفتاح السیسی، فلسطینی صدر محمود عباس اور شام کے صدر احمد الشرع کو بھی جگہ دی گئی ہے۔

یہ فہرست مسلم دنیا کی مختلف ریاستوں کی سیاسی اور مذہبی قیادت سمیت دیگر نمایاں شخصیات کا احاطہ کرتی ہے۔

پاکستان سے معروف عالم دین مفتی محمد تقی عثمانی اور مولانا طارق جمیل کو بھی دنیا کی 500 بااثر مسلم شخصیات کی فہرست میں شامل کیا گیا ہے۔

دونوں علمائے کرام مذہبی خدمات اور دینی تعلیم و تبلیغ کے حوالے سے معروف ہیں۔ ان کی شمولیت پاکستان کی مذہبی شخصیات کی عالمی سطح پر نمایاں موجودگی کو ظاہر کرتی ہے۔

فہرست میں غزہ کے کمال عدوان ہسپتال کے سابق سربراہ ڈاکٹر حسام ابو صفیہ کو سال کی نمایاں مرد شخصیت قرار دیا گیا ہے۔

اسی طرح ایران کے شہر میناب میں ایک اسکول پر حملے میں بچ جانے والی طالبہ فاطمہ زہرا شیخ آبادی کو سال کی نمایاں خاتون شخصیت کا اعزاز دیا گیا ہے۔