گڈانی میں پاکستان کسٹمز انفورسمنٹ کی بڑی کارروائی، 11 کلو کوکین برآمد،مالیت 30 کروڑ روپے، 4 ملزمان گرفتار

گڈانی میں پاکستان کسٹمز انفورسمنٹ کی بڑی کارروائی، 11 کلو کوکین برآمد، 4 ملزمان گرفتار، بین الاقوامی مارکیٹ میں منشیات کی مالیت تقریباً 30 کروڑ روپے، کارروائی خفیہ اطلاع پر اُتھل پولیس کے تعاون سے کی گئی

اسلام آباد: پاکستان کسٹمز انفورسمنٹ گڈانی نے منشیات اسمگلنگ کے خلاف بڑی کارروائی کرتے ہوئے 11 کلوگرام مشتبہ کوکین برآمد کرلی، جبکہ کارروائی کے دوران چار ملزمان کو گرفتار بھی کر لیا گیا۔

پاکستان کسٹمز کی جانب سے جاری پریس ریلیز کے مطابق کارروائی ڈائریکٹوریٹ آف انٹیلی جنس اینڈ انویسٹی گیشن (کسٹمز) کی فراہم کردہ خفیہ اطلاع پر کی گئی۔ کارروائی کے دوران گڈانی کے قریب مکران کوسٹل ہائی وے کے زیرو پوائنٹ پر ایک سیاہ رنگ کی ٹویوٹا ریوو ڈبل کیبن گاڑی کو روک کر تلاشی لی گئی۔

کسٹمز حکام نے بتایا کہ گاڑی کے خفیہ خانوں اور ملزمان کی نشاندہی پر قریبی مقام سے مجموعی طور پر 11 کلوگرام مشتبہ کوکین برآمد کی گئی، جو 11 علیحدہ پیکٹس میں موجود تھی اور ہر پیکٹ کا وزن تقریباً ایک کلوگرام تھا۔

حکام کے مطابق برآمد ہونے والی کوکین کی بین الاقوامی غیرقانونی مارکیٹ میں مالیت تقریباً 30 کروڑ روپے ہے، جو اس کارروائی کی اہمیت اور اسمگلنگ کے نیٹ ورک کی وسعت کو ظاہر کرتی ہے۔

یہ کارروائی پاکستان کسٹمز انفورسمنٹ اور اُتھل پولیس نے مشترکہ طور پر انجام دی، جس کے دوران چار ملزمان کو گرفتار کرکے ان کے خلاف متعلقہ قوانین کے تحت مقدمہ درج کر لیا گیا ہے۔

پاکستان کسٹمز کا کہنا ہے کہ گرفتار ملزمان سے تفتیش جاری ہے اور منشیات اسمگلنگ کے اس بین الاقوامی نیٹ ورک سے وابستہ دیگر افراد کی گرفتاری کے لیے بھی کارروائیاں کی جا رہی ہیں۔

کسٹمز حکام کے مطابق یہ کامیاب کارروائی ایک بین الاقوامی منشیات فروش گروہ کے لیے بڑا دھچکا ثابت ہوئی ہے اور اس سے پاکستان کسٹمز کی پیشہ ورانہ صلاحیت اور سرحدوں کو منشیات کی اسمگلنگ سے محفوظ رکھنے کے عزم کا اظہار ہوتا ہے۔

پاکستان کسٹمز نے اس عزم کا اعادہ کیا کہ ممبر (کسٹمز آپریشنز) اور چیف کلیکٹر کسٹمز انفورسمنٹ کی قیادت میں انٹیلی جنس پر مبنی کارروائیوں اور دیگر قانون نافذ کرنے والے اداروں کے تعاون سے منشیات اسمگلنگ اور غیرقانونی تجارت کے خلاف آپریشن مزید تیز کیے جائیں گے۔