وزیراعظم شہباز شریف کی نواز شریف سے جاتی امرا میں ملاقات، عوام کو ریلیف دینے کی ہدایت

وزیراعظم شہباز شریف کی نواز شریف سے جاتی امرا میں ملاقات، عوام کو ریلیف دینے کی ہدایت

لاہور: وزیراعظم شہباز شریف نے جاتی امرا میں مسلم لیگ (ن) کے صدر اور سابق وزیراعظم نواز شریف سے ملاقات کی، جس میں ملک کی مجموعی سیاسی اور معاشی صورتحال سمیت عوام کو ریلیف فراہم کرنے کے اقدامات پر تبادلہ خیال کیا گیا۔

تفصیلات کے مطابق وزیراعظم شہباز شریف نے ملاقات کے دوران نواز شریف کو ملک کی موجودہ سیاسی و معاشی صورتحال اور حکومتی اقدامات سے آگاہ کیا۔

ملاقات میں مہنگائی پر قابو پانے، پٹرولیم مصنوعات کی قیمتوں میں کمی کا فائدہ عوام تک منتقل کرنے اور روزمرہ استعمال کی اشیا کی قیمتیں کم رکھنے کے لیے مؤثر پالیسیوں پر بھی گفتگو ہوئی۔ اس موقع پر نواز شریف نے ہدایت کی کہ پٹرولیم مصنوعات کی قیمتوں میں کمی کا براہ راست فائدہ عوام کو پہنچایا جائے تاکہ مہنگائی کے بوجھ میں کمی آسکے۔

انہوں نے کہا کہ مہنگائی پر قابو پانا ہی عوام کو حقیقی ریلیف فراہم کرنے کا مؤثر طریقہ ہے، اس لیے ایسی پالیسیاں تشکیل دی جائیں جن سے عام شہریوں کو روزمرہ زندگی میں سہولت مل سکے۔ نواز شریف نے مزید کہا کہ حکومت ایسی معاشی پالیسیاں بنائے جن کے نتیجے میں روزمرہ استعمال کی اشیا کی قیمتیں کم رہیں اور عوام کو براہ راست فائدہ پہنچے۔

ان کا کہنا تھا کہ مسلم لیگ (ن) کا خاصہ رہا ہے کہ وہ ایسی پالیسیاں تشکیل دیتی ہے جن کا فائدہ براہ راست عوام تک پہنچے۔

ملاقات میں عوام کو مہنگائی سے ریلیف دینے، معاشی صورتحال بہتر بنانے اور حکومتی پالیسیوں کے ذریعے عام شہریوں کے مسائل کم کرنے کے حوالے سے بھی تبادلہ خیال کیا گیا۔