ایران کے امریکی فوجی اڈوں پر ڈرون حملے، اردن اور بحرین میں کارروائی کا دعویٰ

ایران کا اردن اور بحرین میں امریکی فوجی اڈوں پر ڈرون حملوں کا دعویٰ

ایران کے امریکی فوجی اڈوں پر ڈرون حملے سے متعلق ایرانی حکام نے دعویٰ کیا ہے کہ امریکا کی حالیہ فوجی کارروائیوں کے جواب میں اردن اور بحرین میں واقع امریکی فوجی تنصیبات کو نشانہ بنایا گیا۔

غیر ملکی میڈیا رپورٹس کے مطابق ایرانی مسلح افواج کے بیان میں کہا گیا ہے کہ اردن کے شہر ازرق میں واقع مووفق السلطي ایئر بیس پر صبح کے وقت ڈرون حملہ کیا گیا۔

ایرانی خبر رساں ادارے مہر نیوز کے مطابق ایرانی فوج نے دعویٰ کیا کہ حملے میں امریکی فوج کی رہائشی اور فلاحی عمارتوں کے علاوہ سازوسامان کے گوداموں کو بھی نشانہ بنایا گیا۔

بیان کے مطابق بعد ازاں بحرین میں واقع شیخ عیسیٰ ایئر بیس پر بھی مبینہ طور پر آرش خودکش ڈرونز کے ذریعے حملہ کیا گیا، جس میں امریکی فوج کے آلات رکھنے والے گوداموں اور طیاروں کی دیکھ بھال کے لیے استعمال ہونے والے ہینگرز کو ہدف بنایا گیا۔

خبر رساں ادارے اے ایف پی کے مطابق ایران نے ان کارروائیوں کو امریکا کے خلاف اپنی جوابی کارروائی کا حصہ قرار دیا ہے۔

تاہم خبر لکھے جانے تک امریکا، اردن یا بحرین کی جانب سے ان حملوں یا ان سے ہونے والے ممکنہ نقصانات کی باضابطہ تصدیق یا تردید سامنے نہیں آئی۔

دفاعی تجزیہ کاروں کا کہنا ہے کہ اگر ان دعوؤں کی تصدیق ہوتی ہے تو یہ ایران اور امریکا کے درمیان جاری کشیدگی میں ایک اہم پیش رفت ثابت ہو سکتی ہے، جس کے اثرات مشرق وسطیٰ کی سلامتی، علاقائی استحکام اور خطے میں موجود امریکی فوجی تنصیبات پر مرتب ہو سکتے ہیں۔