طلال چوہدری: پاکستان آج بھی اسرائیل کے ہدف پر ہے، ملک مخالف بیانیے پر سخت کارروائی ہوگی

طلال چوہدری: پاکستان آج بھی اسرائیل کے ہدف پر ہے، ملک مخالف بیانیے پر سخت کارروائی ہوگی

اسلام آباد: وزیر مملکت برائے داخلہ طلال چوہدری نے کہا ہے کہ بھارت اور اسرائیل کے مبینہ گٹھ جوڑ کے باوجود پاکستان کی کامیابی نے پوری مسلم دنیا کا سر فخر سے بلند کیا، تاہم پاکستان آج بھی دشمن قوتوں کے نشانے پر ہے اور قومی سلامتی کے خلاف کسی بھی سرگرمی کو برداشت نہیں کیا جائے گا۔

ویڈیو پیغام میں طلال چوہدری نے کہا کہ پاکستان کے استحکام سے کھیلنے والوں کے ساتھ کسی قسم کی رعایت نہیں برتی جائے گی۔ انہوں نے بانی پی ٹی آئی اور ان کے خاندان پر سخت تنقید کرتے ہوئے دعویٰ کیا کہ ان کا ہدف صرف پاک فوج یا ریاستی ادارے نہیں بلکہ پورا پاکستان ہے۔

انہوں نے کہا کہ نورین نیازی کا حالیہ بیان ایک سوچے سمجھے منصوبے کا حصہ معلوم ہوتا ہے، جس پر قانونی کارروائی کا آغاز کر دیا گیا ہے۔ ان کے بقول نورین نیازی کو متعلقہ اداروں کے سامنے وضاحت کرنا ہوگی کہ انہوں نے ایسا بیان کیوں دیا۔

طلال چوہدری نے مزید کہا کہ یہ نہیں ہو سکتا کہ بار بار ایسے بیانات کو غیر دانستہ غلطی قرار دے کر نظر انداز کر دیا جائے۔ انہوں نے دعویٰ کیا کہ بانی پی ٹی آئی کی دوسری بہن بھی اس نوعیت کے بیانات دے چکی ہیں، جو ریاستی مفادات کے خلاف تصور کیے جا رہے ہیں۔

وزیر مملکت کا کہنا تھا کہ بعض عناصر پاکستان کو کمزور کرنے کے ایجنڈے پر عمل پیرا ہیں اور ان کی سیاست سے واضح ہوتا ہے کہ وہ ملکی مفادات کو نقصان پہنچانا چاہتے ہیں۔ انہوں نے کہا کہ حکومت قومی سلامتی، ریاستی اداروں اور ملک کے استحکام کے خلاف کسی بھی بیانیے پر قانون کے مطابق کارروائی کرے گی۔

دوسری جانب وفاقی وزیر طارق فضل چوہدری نے بھی نورین نیازی کے بیان کی شدید مذمت کرتے ہوئے کہا کہ آپریشن بنیان مرصوص نے پوری دنیا کو پاکستان کی دفاعی صلاحیتوں کا قائل کر دیا۔

انہوں نے کہا کہ امریکی صدر کی جانب سے بھی بھارتی جنگی طیاروں کے گرائے جانے کا متعدد مرتبہ ذکر کیا گیا، جبکہ معرکۂ حق کے حوالے سے نورین نیازی کا بیان انتہائی افسوسناک اور ناقابل قبول ہے۔

وفاقی وزیر نے کہا کہ قومی سلامتی اور دفاع سے متعلق معاملات پر غیر ذمہ دارانہ بیانات قومی مفاد کے خلاف ہیں، جن پر قانون کے مطابق کارروائی ہونی چاہیے۔

ایک بار پھر عمران خان کی بہن نے وہی کچھ کہا جو پورا خاندان بڑی دیر سے اس بات کا اظہار کر رہا ہے قانونی کارروائی شروع کر دی گئی ہے،کوئی خاتون ہے یا مرد قانون کی نظر میں قانون کے مطابق کارروائی ہوگی۔۔طلال چوہدری pic.twitter.com/LKJPBgESJN
— Sheraz Ahmad Sherazi (@Sherazi_Silmian) July 19, 2026