ایران امریکا معاہدے کی دستخطی تقریب، شہباز شریف اور عاصم منیر کل سوئٹزرلینڈ پہنچیں گے

ایران امریکا معاہدے کی دستخطی تقریب، شہباز شریف اور عاصم منیر کل سوئٹزرلینڈ پہنچیں گے

اسلام آباد: ایران اور امریکا کے درمیان متوقع مفاہمتی یادداشت (ایم او یو) کی دستخطی تقریب کے سلسلے میں پاکستانی سفارتی سرگرمیاں تیز ہوگئی ہیں اور انتظامات کو حتمی شکل دینے کے لیے دفتر خارجہ کے اعلیٰ حکام سوئٹزرلینڈ پہنچ گئے ہیں۔

سفارتی ذرائع کے مطابق سیکریٹری خارجہ آمنہ بلوچ وزارت خارجہ کے سینئر افسران کے ہمراہ جنیوا پہنچ چکی ہیں، جہاں وہ دستخطی تقریب کے انتظامات اور بین الاقوامی وفود کی آمد سے متعلق امور کا جائزہ لے رہی ہیں۔

ذرائع کا کہنا ہے کہ دفتر خارجہ کے مزید اعلیٰ حکام بھی آج رات جنیوا روانہ ہوں گے تاکہ تقریب کے تمام انتظامات کو مکمل کیا جا سکے۔

اطلاعات کے مطابق وزیراعظم شہباز شریف، فیلڈ مارشل سید عاصم منیر، نائب وزیراعظم و وزیر خارجہ اسحاق ڈار اور وفاقی وزیر اطلاعات عطا تارڑ کل شام سوئٹزرلینڈ پہنچیں گے اور اہم سفارتی ملاقاتوں کے علاوہ دستخطی تقریب میں بھی شرکت کریں گے۔

سفارتی ذرائع کے مطابق تقریب میں قطر، سعودی عرب، مصر، ترکیہ اور دیگر علاقائی ممالک کے اہم نمائندے بھی شریک ہوں گے، جس سے اس تقریب کی بین الاقوامی اہمیت مزید بڑھ گئی ہے۔

تجزیہ کاروں کے مطابق اگر ایران اور امریکا کے درمیان مجوزہ معاہدہ کامیابی سے طے پا جاتا ہے تو یہ مشرق وسطیٰ میں کشیدگی کم کرنے، عالمی توانائی منڈیوں میں استحکام پیدا کرنے اور سفارتی تعلقات میں بہتری کی جانب ایک اہم پیش رفت ثابت ہوسکتا ہے۔

شہباز شریف اور عاصم منیر کی اس تقریب میں موجودگی کو بھی ایک اہم سفارتی کامیابی قرار دیا جا رہا ہے، کیونکہ شہباز شریف اور عاصم منیر نے حالیہ مہینوں میں خطے میں امن اور مذاکراتی عمل کو فروغ دینے کے لیے مختلف سفارتی کوششوں میں فعال کردار ادا کیا ہے۔