وفاقی وزیر داخلہ محسن نقوی نے سعودی سفارت خانے کے دورے کے دوران کہا کہ پاکستان اور سعودی عرب کے تعلقات خونی رشتوں کی مانند ہیں۔ انہوں نے اعلان کیا کہ بھکاری مافیا کے خلاف زیرو ٹالرنس پالیسی اپنائی گئی ہے جبکہ سعودی عرب نے بھی ہر مشکل وقت میں پاکستان کا ساتھ دینے کے عزم کا اعادہ کیا۔
اسلام آباد میں ڈینگی وائرس کے وار تیز ہوگئے، 24 گھنٹوں کے دوران مزید 13 مریض سامنے آگئے، متاثرین کی مجموعی تعداد 189 ہو گئی۔ شہری اور دیہی علاقوں میں صورتحال تشویشناک ہے۔
قومی اسمبلی میں عمر ایوب نااہلی کے بعد اپوزیشن لیڈر کا چیمبر سیل کر دیا گیا۔ تمام ملازمین کے تبادلے بھی کر دیے گئے جبکہ نئے اپوزیشن لیڈر کی تقرری جلد متوقع ہے۔
وزیراعظم شہباز شریف دورہ چین پر روانہ ہو گئے۔ وہ شنگھائی تعاون تنظیم کے سربراہی اجلاس میں شرکت کریں گے، چینی قیادت اور تاجروں سے ملاقاتیں کریں گے جبکہ اہم تجارتی معاہدوں کا بھی امکان ہے۔
اسلام آباد ہائی کورٹ نے صحافی ارشد شریف کے قتل کیس کی تحقیقات کے لیے جوڈیشل کمیشن بنانے کی حامد میر کی درخواست مسترد کر دی، عدالت نے کہا کہ معاملہ سپریم کورٹ میں زیر التوا ہے۔
قابل تقسیم مالی وسائل کی تقسیم کے لیے گیارہواں قومی مالیاتی کمیشن (این ایف سی) اجلاس 29 اگست کو طلب کر لیا گیا ہے۔ ذرائع کے مطابق وفاقی حکومت صوبوں کو مالیاتی اعداد و شمار، قرض پر سود، انسداد دہشت گردی اور دفاعی اخراجات سے آگاہ کرے گی۔ اجلاس میں بی آئی ایس پی سمیت دیگر بڑے اخراجات پر بھی مشاورت ہوگی۔ وزارتی کمیٹی پہلے ہی نئی حکمت عملی تیار کرچکی ہے، جبکہ اجلاس میں صوبوں اور مرکز کے درمیان حصے کا تعین کلیدی موضوع ہوگا۔ توقع کی جا رہی ہے کہ یہ اجلاس ہنگامہ خیز ثابت ہوگا کیونکہ ماضی میں صرف چار این ایف سی ایوارڈ نتیجہ خیز رہے ہیں۔
پاکستان شدید بارشوں اور سیلاب کی زد میں ہے۔ وزیراعظم شہباز شریف نے امدادی کارروائیاں تیز کرنے، متاثرین کی بحالی اور دریاؤں کے اطراف غیر قانونی تعمیرات کے خلاف قومی مہم شروع کرنے کی ہدایت کی ہے۔
پاکستان کی بڑی سیاسی جماعتیں پاکستان پیپلز پارٹی اور مسلم لیگ (ن) نے ضمنی انتخابات میں مشترکہ حکمت عملی کے تحت مل کر میدان میں اترنے کا فیصلہ کیا ہے۔ اس اتحاد کا مقصد انتخابی کامیابی کو یقینی بنانا اور قومی مفاد کو مقدم رکھنا ہے۔
راولپنڈی میں پاکستان اور بنگلہ دیشی عسکری قیادت کی اہم ملاقات میں دفاعی تعاون کو بڑھانے اور خطے کی سلامتی کے لیے مشترکہ اقدامات پر اتفاق کیا گیا۔ جنرل ساحر شمشاد مرزا اور لیفٹیننٹ جنرل محمد فیض الرحمٰن نے انسداد دہشت گردی، عسکری تربیت اور علاقائی استحکام کے لیے قریبی تعاون کی ضرورت پر زور دیا۔
وزیراعظم شہباز شریف نے وفاقی کابینہ کے اجلاس میں کہا ہے کہ حالیہ بارشوں اور سیلاب سے متاثرہ عوام کی مکمل بحالی تک چین سے نہیں بیٹھیں گے۔ وفاق اور صوبے مل کر امدادی سرگرمیوں میں مصروف ہیں، جبکہ پاک فوج اور این ڈی ایم اے متاثرہ علاقوں میں ریلیف آپریشنز جاری رکھے ہوئے ہیں۔
