بنوں میں میرانشاہ روڈ پر اسسٹنٹ کمشنر شمالی وزیرستان کی گاڑی پر دہشت گردوں کے حملے میں اسسٹنٹ کمشنر شاہ ولی، دو پولیس اہلکار اور ایک شہری شہید ہوگئے جبکہ دو اہلکار زخمی ہوئے۔ حملہ کینٹ تھانے کی حدود میں ہوا جہاں دہشت گردوں نے فائرنگ کے بعد گاڑی کو آگ لگا دی۔
خیبرپختونخوا کے ضلع لکی مروت میں تجوڑی پولیس اسٹیشن کی موبائل پر خودکش حملے میں ایک اہلکار شہید اور پانچ زخمی ہوگئے۔ دھماکے کے بعد پولیس کی بھاری نفری نے علاقے کو گھیرے میں لے لیا اور سرچ آپریشن شروع کر دیا۔ زخمیوں کو اسپتال منتقل کر دیا گیا ہے جبکہ واقعے کی مکمل تحقیقات جاری ہیں۔
کراچی کے علاقے گلشن اقبال میں نیپا چورنگی کے قریب کھلے مین ہول میں گرنے والا 3 سالہ بچہ گھنٹوں گزرنے کے باوجود تاحال لاپتا ہے۔ شہریوں نے شدید احتجاج کرتے ہوئے یونیورسٹی روڈ بند کردی اور پولیس و میڈیا پر پتھراؤ کیا۔ ریسکیو 1122 کے مطابق بھاری مشینری کے ساتھ پانچ مقامات کی کھدائی کی گئی لیکن بچے کا کوئی پتا نہیں چل سکا۔ واقعے پر سندھ حکومت اور شہری انتظامیہ نے تحقیقات شروع کردی ہیں۔
آرمی چیف فیلڈ مارشل عاصم منیر سے مصر کے وزیر خارجہ ڈاکٹر بدر احمد محمد عبدالعاطی نے خصوصی ملاقات کی جس میں دونوں برادر ممالک کے درمیان دوطرفہ تعلقات، دفاعی و سیکیورٹی تعاون، عسکری تربیت، اسٹریٹجک ہم آہنگی اور علاقائی امن و استحکام جیسے اہم امور پر تفصیلی بات چیت کی گئی۔ مصری وزیر خارجہ نے پاکستان کے ساتھ ہر شعبے میں تعاون بڑھانے کے عزم کا اظہار کیا اور بدلتی علاقائی سیکیورٹی صورتحال کے تناظر میں اعلیٰ سطح کے رابطوں کی اہمیت پر زور دیا۔
وزیر دفاع خواجہ آصف نے کہا ہے کہ چیف آف ڈیفنس فورسز (سی ڈی ایف) کی تقرری کا نوٹیفکیشن مقررہ وقت پر جاری کر دیا جائے گا اور اس پر کام شروع ہو چکا ہے۔ انہوں نے کہا کہ غیر ضروری قیاس آرائیاں گمراہ کن ہیں اور نوٹیفکیشن وزیر اعظم کی وطن واپسی کے بعد جاری ہوگا۔
این اے 18 ہری پور کے ضمنی انتخاب سے متعلق لگائے گئے تمام الزامات کو الیکشن کمیشن نے مکمل طور پر مسترد کرتے ہوئے واضح کیا ہے کہ انتخابی عمل کو تنازع بنانے کی کوشش کی جا رہی ہے۔ ڈان نیوز کے مطابق الیکشن کمیشن نے کہا کہ مخصوص حلقے الیکشن ہارنے کے بعد بے بنیاد اعتراضات اٹھا رہے ہیں، جبکہ ڈی آر او اور آر او کی تعیناتی سمیت تمام انتظامات قانون کے مطابق کیے گئے تھے۔
اسلام آباد میں اسحاق ڈار اور مصری وزیر خارجہ بدر عبدالعاطی نے دوطرفہ تجارتی تعاون بڑھانے پر اتفاق کیا اور 250 کاروباری اداروں کی فہرست شیئر کرنے کا اعلان کیا۔
پاکستان کے پہلے چیف آف ڈیفنس فورسز (سی ڈی ایف) کی تقرری کا نوٹیفکیشن 29 نومبر کی ڈیڈ لائن گزرنے کے باوجود جاری نہیں ہوا جس سے آئینی پیچیدگیوں، فوجی ڈھانچے کی نئی تشکیل اور آرمی چیف کی مدتِ ملازمت کے آغاز کی تاریخ سے متعلق اہم سوالات پیدا ہوگئے ہیں۔
سبی میں 3 شدت کے زلزلے کے جھٹکے محسوس کیے گئے۔ لوگ گھروں سے باہر نکل آئے، تاہم کوئی جانی نقصان نہیں ہوا۔
وفاقی آئینی عدالت نے صحافی ارشد شریف قتل کیس کی سماعت 3 دسمبر کو مقرر کر دی۔ دو رکنی بینچ کیس کا جائزہ لے گا جبکہ ازخود نوٹس کی منتقلی 27ویں آئینی ترمیم کے تحت ممکن ہوئی۔
